Read the Bible

²“Yn wir, chwi yw'r bobl,

a chyda chwi y derfydd doethineb!

³Ond y mae gennyf finnau ddeall fel chwithau,

ac nid wyf yn salach na chwi;

yn wir, pwy sydd heb wybod hyn?

⁴“Yr wyf yn gyff gwawd i'm cyfeillion,

er imi alw ar Dduw ac iddo yntau ateb;

y cyfiawn a'r perffaith yn gyff gwawd!

⁵Dirmygir dinistr gan y rhai sydd mewn esmwythyd,

a sefydlogrwydd gan y rhai y mae eu traed yn llithro.

⁶Llwyddiant sydd ym mhebyll yr anrheithwyr,

a diogelwch i'r rhai sy'n blino Duw—

rhai wedi cael Duw dan eu bawd!

⁷“Ond yn awr gofyn i'r anifeiliaid dy ddysgu,

ac i adar y nefoedd fynegi i ti,

⁸neu i blanhigion y tir dy hyfforddi,

ac i bysgod y môr dy gyfarwyddo.

⁹Pwy na ddealla oddi wrth hyn i gyd

mai llaw'r ARGLWYDD a'u gwnaeth?

¹⁰Yn ei law ef y mae einioes pob peth byw,

ac anadl pob un meidrol.

¹¹Onid yw'r glust yn profi geiriau,

fel y mae taflod y genau yn blasu bwyd?

¹²“Ai ymhlith yr oedrannus y ceir doethineb,

a deall gyda'r rhai sydd ymlaen mewn dyddiau?

¹³Gan Dduw y mae doethineb a chryfder,

a chyngor a deall sydd eiddo iddo.

¹⁴Os dinistria, nid adeiledir:

os carchara neb, nid oes rhyddhad.

¹⁵Os atal ef y dyfroedd, yna y mae sychder;

a phan ollwng hwy, yna gorlifant y ddaear.

¹⁶Ganddo ef y mae nerth a gwir ddoethineb;

ef biau'r sawl a dwyllir a'r sawl sy'n twyllo.

¹⁷Gwna i gynghorwyr gerdded yn droednoeth,

a gwawdia farnwyr.

¹⁸Y mae'n datod gwregys brenhinoedd,

ac yn rhwymo carpiau am eu llwynau.

¹⁹Gwna i offeiriaid gerdded yn droednoeth,

a lloria'r rhai sefydledig.

²⁰Diddyma ymadrodd y rhai y credir ynddynt,

a chymer graffter yr henuriaid oddi wrthynt.

²¹Fe dywallt ddirmyg ar bendefigion,

a gwanhau nerth y cryfion.

²²Y mae'n datguddio cyfrinachau o'r tywyllwch,

ac yn troi'r fagddu yn oleuni.

²³Fe amlha genhedloedd, ac yna fe'u dinistria;

fe ehanga genhedloedd, ac yna fe'u dwg ymaith.

²⁴Diddyma farn penaethiaid y ddaear,

a pheri iddynt grwydro mewn diffeithwch di-ffordd;

²⁵ymbalfalant yn y tywyllwch heb oleuni;

fe wna iddynt simsanu fel meddwon.”