Read the Bible

Fel corwynt yn chwyrlïo dros y Negef,

felly y daw dinistr o'r anialwch, o wlad ofnadwy.

²Mynegwyd gweledigaeth greulon i mi:

bradwr yn bradychu, anrheithiwr yn anrheithio.

Cod, Elam! I'r gwarchae, Fediaid!

Rhof daw ar bob griddfan a achoswyd.

³Am hynny llanwyd fy lwynau â gofid,

cydiwyd ynof gan wewyr, fel gwraig wrth esgor;

cythryblwyd fi wrth ei glywed,

brawychais wrth ei weld.

⁴Y mae fy meddwl yn drysu, a braw yn fy nirdynnu;

trodd yr hwyrddydd a ddymunais yn ddychryn imi.

⁵Huliant fwrdd, taenant y lliain,

y maent yn bwyta ac yfed.

Codwch, chwi dywysogion, gloywch eich tarian.

⁶Oherwydd fel hyn y dywed yr Arglwydd wrthyf:

“Dos, gosod wyliwr i fynegi'r hyn a wêl.

⁷Os bydd yn gweld cerbyd gyda phâr o feirch,

marchog ar asyn neu farchog ar gamel,

y mae i sylwi'n ddyfal, ddyfal.”

⁸Yna fe lefodd y gwyliwr,

“Rwyf wedi sefyll ar y tŵr ar hyd y dydd, O Arglwydd,

ac rwyf wedi cadw gwyliadwriaeth am nosau cyfan;

⁹a dyma a ddaeth—gŵr mewn cerbyd gyda phâr o feirch,

yn dweud, ‘Y mae wedi syrthio! Y mae Babilon wedi syrthio,

a holl ddelwau ei duwiau wedi eu dryllio i'r llawr.’ ”

¹⁰Chwi, fy eiddo a fu dan y dyrnwr ac a nithiwyd,

mynegais i chwi yr hyn a glywais

gan ARGLWYDD y Lluoedd, Duw Israel.

Geilw un arnaf o Seir,

“O wyliwr, beth am y nos?

O wyliwr, beth am y nos?”

¹²Atebodd y gwyliwr,

“Daw bore, a nos hefyd.

Os ydych am ofyn, gofynnwch,

a dewch yn ôl eto.”

Yn llwyni Arabia y lletywch,

chwi garafanau Dedanim;

¹⁴dewch â diod i gyfarfod y rhai sychedig.

Chwi drigolion Tema,

ewch i gyfarfod y fföedigion â bara;

¹⁵oherwydd ffoesant rhag y cleddyf, rhag y cleddyf noeth

a'r bwa anelog, a rhag pwys y frwydr.