Read the Bible

²Cododd yr ARGLWYDD o Sinai

a gwawriodd arnynt o Seir;

disgleiriodd o Fynydd Paran

a dod â myrddiynau o Cades,

o'r de, o lethrau'r mynyddoedd.

³Yn ddiau, y mae'n caru ei bobl,

a'i holl saint sydd yn ei law;

plygant yn isel wrth ei draed

a derbyn ei ddysgeidiaeth,

⁴y gyfraith a orchmynnodd Moses inni,

yn etifeddiaeth i gynulliad Jacob.

⁵Gwnaed ef yn frenin ar Jesurun

pan ymgasglodd penaethiaid y bobl,

a phan ddaeth llwythau Israel ynghyd.

⁶Bydded Reuben fyw, ac nid marw,

ond na foed ei dylwyth yn niferus.

Clyw, O ARGLWYDD, lef Jwda,

a dwg ef at ei bobl;

â'i ddwylo yr ymdrechodd—

ond bydd di'n gymorth iddo rhag ei elynion.

Rho i Lefi dy Twmim,

a'th Wrim i'r un sy'n ffyddlon iti;

fe'i profaist yn Massa,

a dadlau ag ef wrth ddyfroedd Meriba.

⁹Fe ddywed am ei dad a'i fam,

“Nid wyf yn eu hystyried”,

ac nid yw'n cydnabod ei frodyr

nac yn arddel ei blant.

Oherwydd bu'n cadw dy air

ac yn gwarchod dy gyfamod.

¹⁰Y mae'n dysgu dy ddeddfau i Jacob

a'th gyfraith i Israel.

Y mae'n gosod arogldarth ger dy fron,

a'r aberth llwyr ar dy allor.

¹¹Bendithia, O ARGLWYDD, ei wrhydri,

a derbyn waith ei ddwylo.

Dryllia lwynau'r rhai sy'n codi yn ei erbyn,

ac eiddo'i gaseion, rhag iddynt godi eto.

Bydded i anwylyd yr ARGLWYDD fyw mewn diogelwch;

bydded i'r Goruchaf gysgodi drosto trwy'r dydd,

a gwneud ei drigfan rhwng ei lechweddau.

Bydded i'w dir gael ei fendithio gan yr ARGLWYDD

â ffrwyth gorau'r nef, y gwlith,

a dŵr o'r dyfnder isod;

¹⁴â chynnyrch gorau'r haul,

a thwf gorau'r misoedd;

¹⁵â phrif gynnyrch y mynyddoedd hen,

a ffrwythlondeb y bryniau oesol,

¹⁶â gorau'r ddaear a'i llawnder,

a ffafr preswylydd y berth.

Doed hyn i gyd ar ben Joseff,

ar gopa'r un a neilltuwyd ymysg ei frodyr.

¹⁷Boed ei ysblander fel eiddo'r ych blaenaf,

a'i gyrn fel cyrn ych gwyllt;

bydd yn cornio'r bobloedd â hwy

a'u gyrru hyd eithaf y ddaear.

Rhai felly fydd myrddiynau Effraim,

rhai felly fydd miloedd Manasse.

Llawenha, Sabulon, wrth fynd allan i ryfel,

ac Issachar yn dy bebyll.

¹⁹Galwant bobloedd allan i'r mynydd-dir,

ac yno offrymu aberthau cywir.

Yn wir, cânt sugno golud y môr,

a thrysorau wedi eu cuddio yn y tywod.

Bendith ar yr hwn sy'n peri i Gad ymestyn!

Y mae fel llew yn ei diriogaeth,

yn rhwygo ymaith fraich a chorun.

²¹Gofalodd am y gorau iddo'i hun;

cadwyd cyfran llywodraethwr ar ei gyfer.

Daeth â phenaethiaid y bobl allan;

gweithredodd gyfiawnder yr ARGLWYDD,

a'i ddeddfau ynglŷn ag Israel.

Cenau llew yw Dan,

yn neidio allan o Basan.

Cyflawn o hawddgarwch fydd Nafftali,

a llawn o fendith yr ARGLWYDD;

bydd ei etifeddiaeth at y môr ac i'r de.

Bydded i Aser gael ei fendithio'n fwy na'r meibion eraill,

a bod yn ffefryn gan ei frodyr,

yn trochi ei droed mewn olew.

²⁵Bydded dy farrau o haearn a phres,

a'th gryfder yn cydredeg â'th ddyddiau.

²⁶Nid oes tebyg i Dduw Jesurun,

sy'n marchogaeth trwy'r nef i'th gynorthwyo,

ac ar y cymylau yn ei ogoniant.

²⁷Duw'r oesoedd yw dy noddfa,

ac oddi tanodd y mae'r breichiau tragwyddol.

Gyrrodd allan y gelyn o'th flaen,

a dweud, “Difetha ef.”

²⁸Cafodd Israel fyw yn ddiogel,

a Jacob drigo heb ymyrraeth,

mewn gwlad o ŷd a gwin,

a'i wybrennau'n diferu gwlith.

²⁹Gwyn dy fyd, Israel! Pwy sydd debyg iti,

yn bobl a waredir gan yr ARGLWYDD?

Ef yw dy darian a'th gymorth,

a chleddyf dy orfoledd hefyd.

Bydd dy elynion yn ymostwng o'th flaen,

a thithau'n sathru ar eu huchel-leoedd.