Read the Bible

²“Os mentra rhywun lefaru wrthyt, a golli di dy amynedd?

Eto pwy a all atal geiriau?

³Wele, buost yn cynghori llawer

ac yn nerthu'r llesg eu dwylo;

⁴cynhaliodd dy eiriau'r rhai sigledig,

a chadarnhau'r gliniau gwan.

⁵Ond yn awr daeth adfyd arnat ti, a chymeraist dramgwydd;

cyffyrddodd â thi, ac yr wyt mewn helbul.

⁶Onid yw dy dduwioldeb yn hyder i ti,

ac uniondeb dy fywyd yn obaith?

⁷Ystyria'n awr, pwy sydd wedi ei ddifetha ac yntau'n ddieuog,

a phwy o'r uniawn sydd wedi ei dorri i lawr?

⁸Fel hyn y gwelais i: y rhai sy'n aredig helbul

ac yn hau gorthrymder, hwy sy'n ei fedi.

⁹Difethir hwy gan anadl Duw,

a darfyddant wrth chwythiad ei ffroenau.

¹⁰Peidia rhu'r llew a llais y llew cryf;

pydra dannedd y llewod ifanc.

¹¹Bydd farw'r hen lew o eisiau ysglyfaeth,

a gwneir yn amddifad genawon y llewes.

¹²‘Daeth gair ataf fi yn ddirgel;

daliodd fy nghlust sibrwd ohono

¹³yn y cynnwrf a ddaw gyda gweledigaethau'r nos,

pan ddaw trymgwsg ar bawb.’

¹⁴Daeth dychryn a chryndod arnaf,

a chynhyrfu fy holl esgyrn.

¹⁵Llithrodd awel heibio i'm hwyneb,

a gwnaeth i flew fy nghorff sefyll.

¹⁶Safodd yn llonydd, ond ni allwn ddirnad beth oedd;

yr oedd ffurf o flaen fy llygaid;

bu distawrwydd, yna clywais lais:

¹⁷‘A yw meidrol yn fwy cyfiawn na Duw,

ac yn burach na'i Wneuthurwr?

¹⁸Os nad yw Duw'n ymddiried yn ei weision,

ac os yw'n cyhuddo'i angylion o gamwedd,

¹⁹beth, ynteu, am y rhai sy'n trigo mewn tai o glai,

a'u sylfeini mewn pridd,

y rhai a falurir yn gynt na gwyfyn?

²⁰Torrir hwy i lawr rhwng bore a hwyr,

llwyr ddifethir hwy, heb neb yn sylwi.

²¹Pan ddatodir llinyn eu pabell,

oni fyddant farw heb ddoethineb?’ ”