¹Yndellma, gesyn dyskasow elvennek Krist ha mos yn-rag dhe berfydhder, heb gorra a-nowydh an selven a dreylya yn edrega dhiworth oberow marow hag a fydh war-tu ha Duw, ²gans dyskans a-dro dhe vesydhyansow, gorrans diwleuv ha breus bys vykken. ³Hag yndella ni a wra, mar mynn Duw. ⁴Rag ny yllir daskorr arta dhe edrek an re re beu unnweyth enowys, re dastyas an ro nevek ha re dheuth ha bos kevrennoryon a'n Spyrys Sans, ⁵ha re dastyas dader ger Duw ha gwriansow nerthek a'n oes dhe dhos, ⁶hag ena y koedhsons a-denewen, rag i a growssons Mab Duw arta ragdha i aga honan ha gul bismer dhodho. ⁷Rag tir re evas an glaw a goedh menowgh warnodho, hag a dhre yn-rag losow dhe les dhe'n re ragdha y feu gonedhys, a dhegemmer bennath Duw. ⁸Mes mar tre yn-rag spern hag askall yth yw heb les hag ogas milligys; ha leski vydh y dhiwedh.

⁹Kyn kewsyn yndellma, yn agas kas hwi, karadowyon, surhes on a daklow gwell a dheu gans selwyans. ¹⁰Rag nyns yw Duw kammhynsek owth ankevi agas ober ha'n gerensa a dhiskwedhsowgh a'y wovis ev ow servya an syns, ha dell wrewgh hwath lemmyn. ¹¹Mes hwans a'gan beus y tiskwedhowgh, pub huni, an keth mall dhe dhrehedhes leun surneth a wovenek bys y'n diwedh, ¹²ma na vowgh syger mes holyoryon an re a erit, dre fydh ha perthyans, an ambosow.

Ambos Duw

¹³Rag pan wrug Duw ambosa dhe Abraham, a-ban na'n jevo denvyth moyha dredho may hylli ti, ev a dos dredho y honan, ¹⁴ow leverel, ‘Yn tevri my a'th vennik ha'th palshe.’ ¹⁵Hag yndellma wosa perthi hirneth, ev a dhegemmeras an ambos. ¹⁶Rag tus a de der onan moyha agessa i aga honan, hag yn aga hedrynnow oll, ti res yn afydhyans yw diwedh pub dadhel. ¹⁷Ytho, pan vynnas Duw diskwedhes dhe glerra dhe eryon an ambos gnas antreylyadow y dowl, ev a'n fastyas gans ti ¹⁸may fen kennerthys yn krev, pan fiyn rag skovva, dhe dhalghenna an govenek gorrys a-ragon, dre reson dew dra na yll Duw gowleverel ynna. ¹⁹Hemma y'gan beus avel ankor an enev, sur ha fast, govenek a enter an barth a-bervedh, a-ji dhe'n vayl, ²⁰le mayth eth Yesu avel ragreser ragon ni, wosa dos ha bos arghoferyas bys vykken war-lergh ordyr Melkisedek.