Zekaria 13
Glanheans a Beghadow
1Y'n jydh na y fydh fenten igerys dhe ji Davydh ha dhe drigoryon Yerusalem rag pegh ha mostedhes. 2Y'n jydh na, yn-medh Arloedh an luyow, my a wra dilea henwyn an imajys dhiworth an tir, ha ny vydhons kovhes byth moy; ynwedh my a wra gorra dhe-ves a'n tir an brofoesi ha'n spyrys avlan. 3Mar kwra nebonan profoesa hwath, ena y das ha'y vamm a'n dineythis a lever dhodho, ‘Ny vewydh; rag ty re wowleveris yn hanow an Arloedh.’ Y das ha'y vamm a'n dineythis a wra y wana pan wra ev profoesa.
4Y'n jydh na, pub profoes a vydh methek a'y welesigeth, pan wra ev profoesa. Ny wisk mantell blew rag may toello. 5Ev a lever, ‘Nyns ov vy profoes, tiek ov vy; rag den a'm prenas dhiworth ow yowynkneth.’ 6Nebonan a lever dhodho, ‘Pyth yw an goliow ma yntra dha dhiwla?’ Ena ev a lever, ‘An goliow a gemmeris yn chi ow howetha.’
Notes for verses 4–62 entries
Text notes
Zechariah 13:5 den a'm prena: Styr an Ebrow yw ankler. Martesen my re bewva tir. View in passage
Zechariah 13:6 yntra dha dhiwla: Martesen an styr yw war dha geyn, po war dha gloes-diwvronn. Henn yw sin a honan-skorjya, dell o gwrys yn gordhyans pagan. View in passage
An Bugel Gweskys, ha'n Flokk Skattrys
7‘Difun, A gledha, erbynn ow bugel,
erbynn an den yw ow howeth!’
yn-medh Arloedh an luyow.
Gwask an bugel,
ha'n deves a vydh skattrys,
ha my a dreyl ow leuv erbynn an re vyghan.
8Yn oll an tir, yn-medh an Arloedh,
diw rann a vydh treghys dhe-ves hag y ferwons;
mes an tressa a vydh gesys ynno.
9My a dhre an tressa rann dre'n tan,
ha'ga furhe dell yw purhes an arghans,
a'ga frevi dell yw prevys an owr.
Ev a wra gelwel war ow hanow,
ha my a worthyp dhodho;
my a lever, ‘Ev yw ow fobel’,
hag ev a lever, ‘An Arloedh yw ow Duw.’