Read the Bible

¹Kovha i may fons gostyth dhe rewloryon ha galloesow, dhe obaya, dhe vos parys rag pub ober da, ²heb leverel drog a dhenvyth, heb kedrynna, klor, hag ow tiskwedhes pub uvelder dhe dus oll. ³Rag ni ynwedh o foll, diwostyth, toellys, kethwesyon dhe drokhwansow ha plesours divers, ow pewa yn atti hag avi, kasadow, hag ow kasa an eyl y gila. ⁴Mes pan omdhiskwedhas kuvder ha kerensa Duw agan Selwador, ⁵ny'gan selwis ev dre wriansow a wrussyn ni yn ewnder, mes war-lergh y dregeredh ev dre wolghi daskenesigeth ha nowydhheans an Spyrys Sans ⁶a dhiveris warnan yn rych dre Yesu Krist agan Selwador, ⁷may teffyn ha bos heryon war-lergh govenek bewnans heb worfenn, justifiys gans y ras. ⁸Lel yw an ger.

My a vynn ty dhe ynnia an taklow ma, may prederro an re re wrug krysi yn Duw a-dro dhe omri dhe oberow da. An taklow ma yw da ha dhe les dhe vab-den. ⁹Mes skon hwithransow gokki, aghskrifow, strifow hag omladhow a-dro dhe'n lagha, rag heb les hag euver yns i. ¹⁰Den a wra folsyow, wosa kynsa ha nessa gwarnyans, skon ev, ¹¹ow kodhvos den a'n par na dhe vos treylys yn kamm, ha peghador; omdhampnys yw.

¹²Pan dhannvonniv Artemas po Tyghikus dhis, gwra assaya dhe dhos dhymm yn Nikopolis rag ena re erviris spena an gwav. ¹³Zenas, an laghyas, hag Apollos, dannvon i yn hast war aga fordh ma na fallo travyth dhedha. ¹⁴Ha dyskens agan tus ynwedh omri dhe oberow da rag kollenwel edhommow a res, ma na vons i heb frut vyth.

¹⁵Oll an re usi genev a'th tynnergh. Dynnargh an re a'gan kar y'n fydh.

Gras re bo genowgh hwi oll.