Read the Bible

¹Otta, teg osta ow hares,

otta, ass osta teg!

Dha dhewlagas yw kelemmi

a-dryv dha vayl.

Dha vlew yw avel gre a ever,

ow lamma yn-nans war ledrow Gilead

²Dha dhyns yw kepar ha gre a dheves knyvys

devedhys yn-bann dhiworth an wolghva,

pub huni anedha ow toen gevellyon,

heb onan vyth anedha ow kelli askorr.

³Avel neusenn gogh yw dha dhiwweus,

ha hweg yw dha anow.

Dha eryow yw avel tregh a reunaval

a-dryv dha vayl.

⁴Kepar ha tour Davydh yw dha gonna,

drehevys gans resyow a veyn,

warnodho ow kregi mil vokler,

i oll skoesow kasoryon.

⁵Dha dhiwvronn yw avel diw elen,

gevellyon a ewik,

neb a beur yn mysk an lili.

⁶Bys pan anello an jydh,

ha'n skeusow a fi dhe'n fo,

my a dhe'n menydh a vyrr,

ha dhe'n vre a frankynkys.

⁷Teg osta, ow hares;

nyns eus namm ynnos.

⁸Deus a-dhiworth Lebanon, ow fries,

deus a-dhiworth Lebanon.

Diyskynn a-dhiwar dopp Amana,

a-dhiwar benn Senir ha Hermon,

a-dhiworth fowys lewyon,

a-dhiworth menydhyow lewpardes.

⁹Ty re ladras ow holonn, ow hwoer, ow fries,

ty re ladras ow holonn der unn mir uskis a'th tewlagas,

der unn degenn a'th torgh.

¹⁰Ass yw hweg dha gerensa, ow hwoer, ow fries!

ass yw gwell dha gerensa ages gwin,

ha sawer dha oylys ages oll spisys!

¹¹Dha dhiwweus a dhever mel dell ve dhiworth an gribenn, ow fries;

yma mel ha leth yn-dann dha daves,

hag ethenn dha dhillas yw avel ethenn Lebanon.

¹²Lowarth yn-dann alhwedh yw ow hwoer, ow fries,

lowarth alhwedhys, fenten selys.

¹³Dha eginyow yw paradhis a reunavalow

gans frut dentethyel,

henna gans spiknard,

¹⁴spiknard ha safron, kalamus ha kanel,

gans pub gwydhenn frankynkys,

myrr hag aloes,

gans oll an gwella spisys.

¹⁵Fenten yn lowarth, fenten a dhowrow bew,

ha goverow ow resek yn-nans dhiworth Lebanon.

¹⁶Difun, A wyns an gogledh,

ha deus, A wyns an dyghow!

hwyth war ow lowarth,

dhe lesa y spisys.

Des ow haradow dh'y lowarth,

ha dybri y frut dentethyel.