Read the Bible

¹Rosenn a Sharon ov vy,

lilienn a'n nansow.

²Avel lilienn yn mysk an spern,

yndella yw ow hares yn mysk an myrghes.

³Avel avalenn yn mysk gwydh an goeswik,

yndella yw ow haradow yn mysk an vebyon.

Gans meur a dhesir my a esedhas yn y woskes,

ha hweg o y frut dhe'm stevnik.

⁴Ev re'm kyrghas a-berth y'n gwinji,

ha'y vaner a-ughov o kerensa.

⁵Sostenewgh vy gans tesennow-grappys,

megewgh vy gans avalow,

drefenn ow bos klav dre gerensa.

⁶Yma y leuv gledh yn-dann ow fenn,

hag yma y leuv dhyghow orth ow byrla!

⁷My re'gas konjor, A vyrghes Yerusalem,

re'n yorghes po re'n ewigow a'n mesyow,

Na wra dhe gerensa difuna na movya

bys pan vynno hi.

⁸Lev ow haradow!

otta, ev a dheu,

ow lamma war an menydhyow,

ow terlemmel war an breow.

⁹Ow haradow yw kepar hag ewik,

po karow yowynk.

Ottava, ow sevel

a-dryv agan fos,

ow mires a-bervedh der an fenestri,

ow hwithra der an gloes.

¹⁰Ow haradow a gews ha leverel dhymm,

‘Sav ow hares, ow hwegoll,

ha deus dhe-ves,

¹¹Rag otta, gyllys yw an gwav,

passys dhe-ves yw an glaw – gyllys yw.

¹²Omdhiskwedhes a wrug an bleujennow war an tir,

an termyn rag kana yw devedhys,

ha lev an durenn

yw klewys yn agan bro.

¹³An figbrenn a dheg hy figys gwyrdh,

ha'n gwinbrennyer a dheg aga bleujyow;

i a re ethenn.

Sav, ow melder, ow thekka,

ha deus dhe-ves.’

¹⁴Ow holommenn, yn folsyow an garrek,

yn goskes an kleger,

diskwedh dhymm dha fas,

gas vy dhe glewes dha lev,

rag hweg yw dha lev,

ha teg yw dha fas

¹⁵Dalghennewgh ragon an owrgeun,

an owrgeun byghan

neb a dhistru an gwinlannow,

pan dheg agan gwinlannow aga bleujyow.

¹⁶Ow haradow yw dhymmo vy, ha dhodho ev yth ov vy,

ev a besk yn mysk an lili.

¹⁷Bys pan anello an jydh,

ha'n skeusow a vo fiys dhe'n fo,

treyl, ow haradow, bydh kepar hag ewik, po karow yowynk,

war an menydhyow a spisys.