Diskwedhyans 15
An Eledh gans an Plaow Diwettha
1Ha my a welas tokyn arall yn nev, bras ha marthys, seyth el gans an seyth pla diwettha, rag bos sorr Duw kowlwrys ynna i.
2Ha my a welas kepar ha pan ve mor gwedrek kemmyskys gans tan: ha'n re a wrussa fetha an best ha'y imaj, ha niver y hanow, ow sevel war an mor gwedrek, ha gansa telynnow Duw. 3Hag i a gan kan Moyses gwas Duw, ha kan an Oen, ow leverel,
‘Bras ha marthys yw dha wriansow,
A Arloedh Duw Ollgalloesek;
ewn ha gwir yw dha fordhow,
A Vyghtern an kenedhlow.
4Piw ny berth own ahanas, A Arloedh,
ha gordhya dha hanow?
Rag ty yn unnsel yw sans,
rag pub kenedhel a dheu
dhe wordhya a-dheragos;
rag dha oberow gwiryon re beu diskwedhys.’
Notes for verses 3–41 entry
Text notes
Revelation 15:3 an kenedhlow: War-lergh re a'n dornskrifow an oesow. View in passage
5Ha wosa henna, my a welas, hag otta, tempel tylda an dustuni yn nev a veu igerys, 6ha'n seyth el, gans an seyth pla, a dheuth yn-mes a'n tempel, ow kwiska lien glan ha splann, ha grogysys gans grogys owrek a-dro dh'aga diwvronn. 7Hag onan a'n peswar kreatur bew a ros dhe'n seyth el seyth fiol owrek lenwys a'n sorr a Dhuw, neb a vew trank heb worfenn. 8Ha'n tempel a veu lenwys a vog a'n golewder a Dhuw ha'y alloes, ha denvyth ny ylli mos a-bervedh y'n tempel bys pan veu kowlwrys seyth pla an seyth el.