Salmow 98
Salm.
1Kenewgh dhe'n Arloedh kan nowydh,
rag ev re wrug marthusyon.
Y leuv dhyghow ha'y vregh sans
re wrug budhogoleth ragdho.
2An Arloedh re dherivas y selwyans;
ev re dhiskwedhas y ewnder yn golok an kenedhlow.
3Ev re borthas kov a'y dregeredh ha'y lelder
orth chi Ysrael.
Oll pennow an norvys re welas
selwyans agan Duw.
4Gwra tros heudhik dhe'n Arloedh, oll an nor;
kenewgh, ha germewgh gans joy, ha kenewgh gormola.
5Kenewgh gormola dhe'n Arloedh gans an sowtri,
gans an sowtri ha lev salm.
6Gans tollgern ha son trompa,
gwrewgh tros heudhik a-rag an Myghtern, an Arloedh.
7Tarennes an mor ha myns eus ynno;
an norvys ha myns eus trigys ynno.
8Takyes an livow diwleuv;
garmes an menydhyow war-barth yn lowen
9a-dherag an Arloedh, rag ev a dheu
dhe vreusi an norvys.
Ev a vreus an norvys gans gwiryonedh,
ha'n poblow gans ewnder.