Salmow 96
1Kenewgh dhe'n Arloedh kan nowydh;
kenewgh dhe'n Arloedh, oll an norvys.
2Kenewgh dhe'n Arloedh, bennigewgh y hanow;
diskwedhewgh y selwyans a dhydh dhe dhydh.
3Derivewgh y wolewder yn mysk an kenedhlow,
y varthusyon yn mysk oll an poblow.
4Rag meur yw an Arloedh, ha pur wiw yw y wormel;
res yw perthi own anodho dres oll duwow.
5Rag oll duwow an kenedhlow yw koegyon,
mes an Arloedh a wrug an nevow.
6Yma enor ha meuredh a-dheragdho;
yma nerth ha tekter yn y sentri.
7Askrifewgh dhe'n Arloedh, hwi deyluyow a'n poblow,
askrifewgh dhe'n Arloedh gordhyans ha nerth.
8Askrifewgh dhe'n Arloedh an gordhyans a dhegoedh dh'y hanow;
drewgh offrynn, ha dewgh yn y glosyow.
9Gordhyewgh an Arloedh yn tekter sansoleth;
kren a-dheragdho, oll an norvys.
10Leverewgh yn mysk an kenedhlow, ‘Yma an Arloedh ow reynya!
An nor devri yw fastys, ma na yllir y dhisevel;
ev a vreus an poblow gans ewnder.’
11Lowenhes an nevow, ha bedhes an norvys heudhik;
tarennes an mor, ha myns eus ynno;
12bedhes an gwel fest heudhik ha myns eus ynno.
Ena y lowenha oll gwydh an koes
13a-dherag an Arloedh; rag ev a dheu,
ev a dheu dhe vreusi an norvys.
Ev a vreus an norvys gans ewnder,
ha'n poblow gans y lelder.