Salmow 93
1An Arloedh yw Myghtern, ev re omwiskas yn splannder;
an Arloedh re omwiskas hag yma grogys a nerth a-dro dhodho.
An norvys devri yw fastys, ma na yllir y dhisevel.
2Dha se a veu fastys bythkweth;
ty re beu, trank heb worfenn.
3An livow re dhrehevis, A Arloedh,
an livow re dhrehevis aga lev;
an livow a dhrehav aga thonnow.
4Kreffa ages dowrow meur,
kreffa ages an mordonnow,
yw an Arloedh, galloesek y'n ughelder.
5Dha dhustuniow, A Arloedh, yw fest sur;
sansoleth a dhelledh dhe'th chi,
A Arloedh, bynitha.