Read the Bible

¹My a'th wormel, A Arloedh, a leun golonn;

my a dheriv oll dha varthusyon.

²My a lowenha hag a vydh fest heudhik ynnos;

my a gan gormola dhe'th hanow, an Ughella.

³Pan dreyl ow eskerens war-dhelergh,

i a drebuch ha mos dhe goll a-dheragos.

⁴Rag ty re ventenas ow gwirvreus ha'm ken;

ty re esedhas y'n se, ow preusi yn gwiryonedh.

⁵Ty re geredhis an kenedhlow, ty re dhistruis an tebelwas;

ty re dhefendyas aga hanow dhe-ves bys vykken ha bynnari.

⁶An eskar yw treylys yn magoryow bys vykken;

ty re dhiwreydhyas aga sitys;

aga hovadh res eth dhe goll.

⁷Mes an Arloedh a esedh yn y se bys vykken,

ev re fastyas y se rag breus,

⁸hag ev a vreus an nor yn gwiryonedh;

ev a re gwirvreus dhe'n poblow yn ewnhynseth.

⁹An Arloedh ynwedh a vydh dinas dhe'n den truan,

dinas yn prysyow anken.

¹⁰Ha'n re a aswonn dha hanow a drest ynnos,

rag ty, A Arloedh, ny forsaksys seul a'th hwila.

¹¹Kenewgh gormola dhe'n Arloedh trigys yn Sion,

derivewgh y wriansow yn mysk an poblow.

¹²Rag neb a wovynn goes yn dial a berth kov anedha;

ny ankev garm an voghosogyon.

¹³Bydh grassyes orthiv, A Arloedh;

mir orth ow anken, a wodhavav dhiworth an re a'm kas,

ty neb a'm drehav dhiworth porthow ankow,

¹⁴rag may teriffiv oll dha wormola

yn porthow myrgh Sion;

my a lowenha y'th selwyans.

¹⁵An kenedhlow re sedhis y'n pytt a wrussons;

y'n roes a gudhsons, aga throes aga honan re beu kechys.

¹⁶Aswonnys yw an Arloedh, ev re wrug breus;

an tebelwas yw maglennys gans ober y dhiwleuv y honan. Higgayon. Sela.

¹⁷An debeles a dhehwel dhe Sheol,

oll an kenedhlow hag a ankovas Duw.

¹⁸Rag ny vydh an den edhommek ankevys bynitha,

ha nyns a dhe goll bys vykken govenek an voghosogyon.

¹⁹Sav, A Arloedh, na as den dhe dryghi;

bedhes an kenedhlow breusys a-dheragos

²⁰Gorr own ynna, A Arloedh;

godhvydhes an kenedhlow nag yns marnas tus. Sela.