Salmow 82
Salm a Asaf.
1Duw a sev yn kuntelles nev;
ev a vreus yn mysk an duwow.
2‘Pygemmys prys y freusowgh yn kamm,
ow plegya dhe'n debeles? Sela.
3Rewgh gwirvreus dhe'n den gwann ha dhe'n omdhivas;
mentenewgh gwiryow an boghosek ha'n edhommek.
4Difresewgh an den gwann ha'n boghosek;
gwrewgh aga delivra dhiworth leuv an debeles.’
5Ny wodhons ha ny gonvedhons,
mes i a gerdh yn-rag yn tewolgow;
oll selyow an nor a gren.
6My a leveris, ‘Hwi yw duwow,
ha hwi oll yw fleghes an Ughella.
7Byttegyns hwi a verow avel mab-den,
ha koedha avel onan a'n bennternedh.’
8Sav, A Dhuw, breus an nor;
rag ty a erit an kenedhlow oll.