Read the Bible

¹Goslow, A vugel Ysrael,

ty neb a hembronk Yosep avel flokk;

omdhiskwa, ty neb a drig ynter an cherubim.

²A-dherag Efraym ha Benyamin ha Manasse,

difun dha nerth,

ha deus dh'agan selwel.

³Treyl ni arta, a Dhuw;

gwra dhe'th fas golowi, ha ni a vydh selwys.

⁴A Arloedh Duw an luyow,

pygemmys prys y serrydh orth pysadow dha bobel?

⁵Ty re's magas gans bara dagrow,

ty re ros dagrow dhedha dhe eva dres musur.

⁶Ty a'gan gwra strif dh'agan kentrevogyon,

ha'gan eskerens a wra ges ahanan.

⁷Treyl ni arta, A Dhuw an luyow;

gwra dhe'th fas golowi, ha ni a vydh selwys.

⁸Ty a dhros gwinbrenn yn-mes a Ejyp;

ty a dewlis dhe-ves an kenedhlow, ha'y blansa ev.

⁹Ty a bareusis an dor ragdho,

hag ev a wreydhyas yn town ha lenwel an tir.

¹⁰An menydhyow o kudhys gans y skeus,

ha sedres Duw gans y skorrennow.

¹¹Ev a dhellos y skorr bys y'n mor,

ha'y skyll bys y'n avon.

¹²Ytho prag y terrsys y geow,

may kemmer oll an dremenysi y rappys?

¹³Torgh an koes a'n raven,

ha bestes an gwel a beur warnodho.

¹⁴Treyl arta, ni a'th pys, A Dhuw an luyow,

mir war-woeles dhiworth nev ha gwel,

ha gwra vri a'n gwinbrenn ma;

¹⁵an winlann a blansas dha leuv dhyghow,

ha'n skorrenn a wrussys mar grev ragos jy dha honan.

¹⁶Leskys yw gans tan, ha treghys yw;

i a dhe goll orth keredh dha fas.

¹⁷Bedhes dha leuv war wour dha leuv dhyghow,

war vab an den a wrussys mar grev ragos jy dha honan.

¹⁸Ytho ny dreylyn ni dhiworthis arta;

bewha ni, ha ni a elow war dha hanow.

¹⁹Treyl ni arta, A Arloedh, Duw an luyow;

gwra dhe'th fas golowi, ha ni a vydh selwys.