Read the Bible

¹A Arloedh ow Duw, ynnos jy y hwilav skovva;

saw vy dhiworth oll an re a'm helgh, ha gwra ow delivra,

²ma na dorrons ow enev avel lew,

orth y skwardya, ha nyns eus delivrer.

³A Arloedh ow Duw, mar kwrugavy hemma;

mars eus sherewneth y'm diwleuv;

⁴mar attylis vy drog dhe'n den esa yn kres genev,

po pylla ow eskar heb ken,

⁵helghyes an eskar ow enev, ha'y gemmeres;

stankyes ev ow bewnans dhe'n dor,

ha gul dhe'm enor growedha y'n doust. Sela.

⁶Sav, A Arloedh, y'th sorr;

omdhrehav erbynn koler ow eskerens;

ha difun, A Dhuw, y'n gwirvreus a worhemmynnsys.

⁷Ha bedhes kuntelles an poblow a-dro dhis;

warnodho kemmer dha se yn ughelder.

⁸An Arloedh a vreus an poblow;

breus vy, A Arloedh, herwydh ow ewnder,

ha herwydh ow gwiryonsys usi ynnov.

⁹Bedhes diwedh dhe dhrogober an debeles,

mes ty gwra fastya an den gwiryon,

ty neb a brev an kolonnow ha'n lonethi,

an Duw gwiryon.

¹⁰Yma ow skoes gans Duw,

neb a selow an re ewn aga holonn.

¹¹Duw yw breusyas gwiryon,

ha Duw neb yw serrys pub dydh.

¹²Mar ny goedh den yn edrek, ev a lymm y gledha;

ev re blegyas y warak, ha'y darbari;

¹³hag ev re dharbaris dhodho daffar mernans;

ev a wra y sethow sheftys a dan.

¹⁴Otta, ev yw torrek gans sherewneth;

ev re gonsevyas dregynn,

ha dineythi falsuri.

¹⁵Ev re balas pytt ha'y gleudhya,

hag ev re goedhas y'n kleudh a wrug.

¹⁶Y dhregynn a dreyl war y benn y honan,

ha'y arowder a dhiyskynn war y glopenn y honan.

¹⁷My a wormel an Arloedh herwydh y ewnder,

ha kana gormola dhe hanow an Arloedh, an Ughella.