Salmow 61
Dhe vester an keur: gans daffar kerdyn. Salm a Davydh.
1Klew ow garm, A Dhuw;
goslow dhe'm pysadow.
2Dhiworth penn an nor y halwav warnas,
pan yw gwann ow holonn.
Hembronk vy dhe'n garrek yw ughella agesov.
3Rag ty re beu skovva dhymm,
ha tour krev erbynn an eskar.
4My a drig y'th tylda bynitha;
my a hwila skovva yn kudhans dha eskelli. Sela.
5Rag ty, A Dhuw, re glewas ow ambosow;
ty re ros dhymm ertach an re a berth own a'th hanow.
6Ty a re dhe'n myghtern bewnans hir,
y vlydhynyow dhe henedhow pals.
7Ev a drig a-dherag Duw bynitha;
re'n gwittho tregeredh ha gwirder.
8Yndella y kanav gormola dhe'th hanow bynitha,
ow tyli ow ambosow pub dydh oll.