Read the Bible

¹Klewewgh hemma, oll an poblow;

rewgh skovarn, oll an re usi trigys y'n norvys.

²Tus isel hag ughel,

an den rych ha'n den boghosek war-barth.

³Ow ganow a gews a furneth;

ha prederow ow holonn a re dhis konvedhes.

⁴My a bleg ow skovarn dhe barabolenn;

my a styr ow lavar tewl war an sowtri.

⁵Prag y porthav own yn drog dhydhyow,

pan omsett kammweyth ow eskerens a-dro dhymm?

⁶I a drest yn aga fythow

hag a vost yn braster aga rychys.

⁷Mes devri ny yll nagonan anedha prena y vroder,

na ri daspren dhe Dhuw ragdho.

⁸Re gostek via daspren y enev,

ha ny allses pe henna bynitha,

⁹rag may fewa bynitha

ha ma na wella an pytt.

¹⁰Rag ev a wel tus skiansek dhe verwel,

ha'n den anfur ha'n talsogh keffrys a dhe goll,

ha gasa aga fythow dhe dus erell.

¹¹Aga bedh yw aga chi bynitha,

ha'ga annedhow a unn henedh dhe'n nessa;

i a elow aga thiryow herwydh aga henwyn aga honan.

¹²Mes ny bes den yn enor;

haval yw dhe'n bestes a verow.

¹³Hemm yw fordh an re dalsogh;

ha plegadow dh'aga henedh yw aga lavarow. Sela.

¹⁴Avel deves ymons i gorrys yn Sheol;

ankow a's bugel,

ha'n re ewnhynsek a wra maystri warnedha y'n myttin.

i a dhiyskynn dison dhe'n bedh.

Aga furv a beder y Sheol;

pell dhiworth aga chiow ughel.

¹⁵Mes Duw a dhaspren ow enev dhiworth dalghenn Sheol,

rag ev a'm degemmer. Sela.

¹⁶Na borth own pan vo gour gwrys rych,

pan vo splannder y ji moghhes.

¹⁷Rag ny gemmer ganso travyth pan varwo;

ny dhiyskynn y splannder war y lergh.

¹⁸Rag ev a vennik y enev hag ev yn few,

ha tus a'th wormel pan sewenydh.

¹⁹Ev a dhe henedh y dasow,

ny welons golow bynitha.

²⁰Mes den yn y vueredh ny gonvedh;

haval yw dhe'n bestes a verow.