Salmow 47
Dhe vester an keur. Salm a vebyon Koragh.
1Takyewgh diwleuv, hwi boblow oll;
kenewgh dhe Dhuw gans lev lowender.
2Rag an Arloedh, an Ughella, yw euthyk,
myghtern bras yw ev war oll an nor.
3Ev a feth an poblow yn-dannon,
ha'n kenedhlow yn-dann agan treys.
4Ev a dhewis agan ertach ragon,
goeth Yakob y garadow. Sela.
5Duw re yskynnas gans garm lowender,
an Arloedh gans lev an trompa.
6Kenewgh gormola dhe Dhuw, kenewgh gormola;
kenewgh gormola dh'agan myghtern, kenewgh gormola.
7Rag Duw yw Myghtern oll an nor;
kenewgh gormola gans skians.
8Reynya a wra Duw war an kenedhlow;
Duw yw esedhys war dron y sansoleth.
9Pennsevigyon an poblow yw omguntellys war-barth,
gans pobel Duw Abraham.
Rag Duw a'n jeves skoesow an nor,
ughelhes yn feur yw ev.