Read the Bible

¹An Arloedh yw ow golow ha'm selwyans;

piw anodho y porthav own?

An Arloedh yw kastell ow bewnans;

piw anodho y fydhav ownek?

²Pan dheuth an dhrogoberoryon y'm ogas

dhe dhybri ow hig,

ow eskerens ha'm envi,

i a drebuchyas ha koedha.

³Kyn hwrello lu kampya er ow fynn,

ny berth ow holonn own;

kyn sortyo bresel er ow fynn,

hwath my a vydh fydhyansek.

⁴Unn dra a wovynnis orth an Arloedh,

henna a hwilav:

my dhe driga yn chi an Arloedh

dres oll dydhyow ow bewnans,

dhe vires orth tekter an Arloedh,

ha dhe brederi yn y dempel.

⁵Rag ev a'm kel yn y skovva

yn jydh anken;

yn goskes y dylda ev a'm kudh;

ev a'm gorr war-vann war garrek.

⁶Ha lemmyn, ow fenn a vydh ughelhes

a-ugh ow eskerens a-derdro;

ha my a offrynn sakrifisow a lowena

yn y skovva;

my a gan, ha kana gormola dhe'n Arloedh.

⁷Goslow, A Arloedh, pan armav gans ow lev,

bydh grassyes orthiv, ha gorthyp dhymm.

⁸Ow holonn re leveris ahanas, ‘Hwila y fas.’

Dha fas, A Arloedh, a hwilav vy.

⁹Na gudh dha fas ragov;

na dowl dha was dhe-ves yn sorr.

Ty re beu ow gweres.

Na wra ow gasa na forsakya,

A Dhuw ow selwyans.

¹⁰Pan y'm forsak vy ow thas ha'm mamm,

an Arloedh a'm degemmer.

¹¹Dysk dhymm dha fordh, A Arloedh,

ha hembronk vy yn hyns kompes,

drefenn ow eskerens.

¹²Na'm ro vy dhe vynnas ow eskerens;

rag fals dhustuniow re sevis er ow fynn,

ha'n re a gews yn hager.

¹³Hemma a grysav, my dhe weles dader an Arloedh

yn tir an re vew.

¹⁴Gwra fydhya y'n Arloedh;

bydh nerthek ha bedhes dha golonn konfortys;

ha gorta an Arloedh.