Salmow 24
Salm a Davydh.
1Dhe'n Arloedh yma an nor ha myns eus ynno,
an norvys, ha'n re usi trigys ynno.
2Rag ev re'n selyas war an moryow,
ha'y fastya war an dowrow.
3Piw a yskynn yn menydh an Arloedh?
Ha piw a sev yn y dyller sans?
4An den glan y dhiwleuv ha pur y golonn,
na dhrehevis y enev dhe euveredh,
na lia yn fals.
5Ev a dhegemmer bennath dhiworth an Arloedh,
hag ewnder dhiworth Duw y selwyans ev.
6Hemm yw kenedhel an re a'n hwila,
neb a hwila fas an Duw a Yakob. Sela.
7Drehevewgh agas pennow, hwi borthow,
ha bedhewgh drehevys, hwi dharasow heb diwedh,
ha'n Myghtern a wolewder a dheu a-bervedh.
8Piw yw an Myghtern a wolewder?
An Arloedh krev ha galloesek,
an Arloedh galloesek yn kas.
9Drehevewgh agas pennow, hwi borthow,
ha bedhewgh drehevys, hwi dharasow heb diwedh,
ha'n Myghtern a wolewder a dheu a-bervedh.
10Piw yw an Myghtern a wolewder?
Arloedh an luyow,
ev yw an Myghtern a wolewder. Sela.