Salmow 21
Dhe vester an keur. Salm a Davydh.
1An myghtern a lowenha y'th nerth, A Arloedh;
hag y'th selwyans, assa vydh ev heudhik!
2Ty re ros dhodho hwans y golonn,
ha ny neghsys dhodho govynnadow y dhiwweus. Sela.
3Rag ty a a-dheragdho gans bennathow dader;
ty a worr kurun a owr fin war y benn.
4Ev a wovynnas bewnans orthis, ha ty a'n ros dhodho,
dydhyow hir bys vykken ha bynnari.
5Meur yw y wolewder ev y'th selwyans;
ty a worr splannder ha meuredh warnodho.
6Rag ty a ros dhodho bennathow bys vykken;
ty a'n gwra heudhik gans lowena a-wel dhe'th fas.
7Rag an myghtern a drest y'n Arloedh;
ha dre dregeredh an Ughella ny wra ev trebuchya.
8Dha leuv a gemmer oll dha eskerens;
dha leuv dhyghow a gemmer an re a'th kas.
9Ty a's gwra kepar ha fornes a dan
yn prys dha sorr.
An Arloedh a's kollenk yn y goler,
ha'n tan a's deber.
10Ty a dhistru aga frut dhiworth an nor,
ha'ga has dhiworth mebyon den.
11Rag i a vynnas drog er dha bynn;
i a dewlis dregynn, mes ny allsons y wul.
12Rakhenna ty a wra dhedha treylya aga heyn;
ty a dharbar kerdyn dha waregow erbynn aga fasow.
13Bydh ughelhes, A Arloedh, y'th nerth!
Ni a gan hag a wormel dha alloes.