Salmow 149
1Gormelewgh an Arloedh.
Kenewgh dhe'n Arloedh kan nowydh,
y wormola yn kuntelles an syns.
2Gwres Ysrael lowenhe yn y Wrier;
bedhes mebyon Sion heudhik yn aga Myghtern.
3Gormelens i y hanow y'n dons,
kanens gormola dhodho gans tabourik ha sowtri.
4Rag an Arloedh a gemmer plesour yn y bobel;
ev a afin an re hwar gans selwyans.
5Lowenhes an syns gans gordhyans;
gwrens i garma yn lowen war aga gweliow.
6Bedhes gormola Duw yn aga ganow,
ha kledha dewvinek yn aga diwleuv;
7dhe gemmeres dial war an kenedhlow,
ha gorra kessydhyans war an poblow;
8dhe gelmi aga myghternedh gans kadonyow,
ha'ga fennsevigyon gans kargharow-horn;
9dhe gollenwel breus warnedha dell yw skrifys.
An enor ma yw gober oll y syns.
Gormelewgh an Arloedh.