Salmow 146
1Gormelewgh an Arloedh.
Gormelewgh an Arloedh, ow enev.
2Hedre vewiv y hwormolav an Arloedh;
my a gan gormola dhe'm Duw ha my hwath yn bosva.
3Na drestyewgh yn pennsevigyon,
nag yn mab-den, ma nag eus selwyans ynno.
4Y anall a dhe-ves, ev a dhehwel dhe'n dor;
y'n jydh na yth a y brederow oll dhe goll.
5Gwynn y vys neb a'n jeves Duw Yakob yn gweres dhodho,
hag yma y drest y'n Arloedh y Dhuw,
6neb a formyas nev ha nor,
an mor ha pup-tra eus ynno;
neb a with gwiryonedh bynitha;
7neb a wra gwirvreus rag an re arweskys,
neb a re boes dhe'n re nownek.
An Arloedh a dhelirv prisnoryon dhe wari;
8an Arloedh a re golok dhe'n dhellyon.
An Arloedh a dhrehav an re blegys dhe'n dor;
an Arloedh a gar an re wiryon.
9An Arloedh a with an alyons;
ev a skoedh an omdhivas ha'n wedhwes,
mes fordh an debeles ev a dhomhwel.
10An Arloedh a reyn bynitha,
dha Duw, A Sion, a unn henedh dhe'n nessa.
Gormelewgh an Arloedh.