Read the Bible

¹A Arloedh, ty re'm hwithras ha'm aswonn.

²Ty a aswonn ow esedha ha'm sevel;

ty a gonvedh ow frederow a bellder.

³Ty a hwither ow hyns ha'm growedha,

ha ty a aswonn oll ow fordhow.

⁴Rag nyns eus ger war ow thaves

heb ty, A Arloedh, dh'y wodhvos yn tien.

⁵Ty re'm degeas a-dryv hag a-rag,

ha gorra dha leuv warnav.

⁶Re varthys ragov yw an skians na;

re ughel yw, ny wonn drehedhes dhodho.

⁷Ple'th av dhiworth dha Spyrys,

ha ple fiav dhiworth dha fas?

⁸Mars av vy yn-bann dhe nev yth esos ena;

mar tarbarav ow gweli yn Sheol ottajy ena ynwedh.

⁹Mar kemmerav eskelli an jydh-tardh

ha triga yn penn pella an mor;

¹⁰ena ynwedh dha leuv a'm hembronk,

ha'th leuv dhyghow a'm syns.

¹¹Mar lavarav, ‘Yn hwir, tewolgow a'm kudh,

ha golow a vydh nos a-dro dhymm’,

¹²hwath nyns yw tewolgow tewl genes jy,

mes an nos a splann avel an jydh;

kehaval yw an tewolgow ha'n golow genes jy.

¹³Rag ty a formyas ow lonethi;

ty a'm gwias war-barth yn brys ow mamm.

¹⁴My a'th wormel, rag euthyk ha marthys osta.

Marthys yw dha oberow,

ha'm enev a woer hemma yn ta.

¹⁵Nyns o ow eskern kudhys ragos,

pan en vy formys yn-dann gel,

gwiys yn konnyk yn rannow isella an nor.

¹⁶Dha dhewlagas a welas ow devnydh kyns ow bos genys,

hag y'th lyver jy oll ow eseli a veu skrifys;

Oll ow dydhyow a veu niverys

kyns onan anedha dhe dhos yn bosva..

¹⁷Ass yw drudh dhymm dha brederow, A Dhuw,

ass yw meur aga sommenn!

¹⁸Mara's niverren, y fiens moy es an tewes;

mar teffen dh'aga gorfenn, y fia ow blydhynyow kehaval dhe'th vlydhynyow jy.

¹⁹Unnweyth mar kwrelles ladha an tebelwas, A Dhuw!

Omdennewgh dhiworthiv ytho, hwi dus woesek.

²⁰I a gews er dha bynn gans droktowlow,

hag i a dhrehav euveredh er dha bynn.

²¹A ny's kasav, A Arloedh, neb a'th kas jy?

A ny'm beus keudh drefenn an re a sev er dha bynn?

²²My a's kas gans kas kowal;

my a's syns yn eskerens.

²³Hwither vy, A Dhuw, ha godhvydh ow holonn;

prov vy, ha godhvydh ow frederow;

²⁴ha gwel mars eus fordh a sherewneth ynnov,

ha hembronk vy y'n fordh nevra a bes.