Salmow 137
1Ryb dowrow Babylon,
ena yth esedhsyn hag oela
pan berthsyn kov ahanas, A Sion.
2Agan sowtris a gregsyn
war an helyk usi ynni.
3Rag ena an re a'gan kemmeras yn kethneth
a wovynnas dhiworthyn kan,
ha'gan tormentorys a wovynnas lowender:
‘Kenewgh dhyn ni onan a ganow Sion.’
4Fatell wren ni kana kan an Arloedh
yn pow estren?
5Mara'th ankovav, A Yerusalem,
re wetthro ow leuv dhyghow.
6Glenes ow thaves orth ow stevnik
mar ny borthav kov ahanas,
mar ny worrav Yerusalem
a-ugh ow fenn-lowender.
7Porth kov, A Arloedh, a vebyon Edom
yn jydh Yerusalem,
fatell lavarsons, ‘Diswrewgh hi, diswrewgh hi,
bys dh'y selyow.’
8A Vyrgh Babylon, re bi ty ynwedh distruys,
gwynn y vys neb a attal dhis
kepar dell wrussys dhyn ni.
9Gwynn y vys neb a gemmerro dha fleghigyow
ha'ga deghesi erbynn an meyn.