Salmow 129
Salm gradhow.
1‘Lieskweyth y grevsons dhymm dhiworth ow yowynkneth’,
gwres Ysrael lemmyn leverel.
2‘Lieskweyth y grevsons dhymm dhiworth ow yowynkneth,
mes ny yllens ow fetha.
3An aradroryon a arasas war ow heyn;
i a wrug aga fynnglow hir.’
4Gwiryon yw an Arloedh;
ev re droghas kerdyn an debeles.
5Perthes meth ha bedhes treylys war-dhelergh
seul a gas Sion.
6Bedhens avel an gwels war an tohow,
hag a wedher kyns ev dhe egina;
7ma na lenow an myswas y dhorn anodho,
na'n manalyer y askra.
8Ha ny lever an dremenysi,
‘Re bo bennath an Arloedh warnowgh;
ni a'th vennik yn hanow an Arloedh.’