Salmow 125
Salm gradhow.
1An re a fydh y'n Arloedh yw avel menydh Sion,
na yll bos disevys, mes ev a dhur bys vykken.
2Kepar dell sev an menydhyow a-dro dhe Yerusalem,
yn kettella y sev an Arloedh a-dro dh'y bobel,
alemma rag ha bys vykken.
3Rag ny wra gwelenn an tebelwas powes
war ranndir an re wiryon,
ma na worro an re wiryon
aga diwleuv dhe sherewneth.
4Gwra da, A Arloedh, orth an re yw da,
hag orth an re yw ewnhynsek aga holonn.
5An re a dreyl a-denewen dh'aga fordhow kamm
an Arloedh a's hembronk dhe-ves gans an dhrogoberoryon.
Re bo kres war Ysrael.