Read the Bible

¹Grassewgh dhe'n Arloedh, rag da yw;

rag y dregeredh a dhur bys vykken.

²Leveres Ysrael lemmyn,

bos y dregeredh ow turya bys vykken.

³Leveres chi Aron lemmyn,

bos y dregeredh ow turya bys vykken.

⁴Leveres lemmyn an re a berth own a'n Arloedh,

bos y dregeredh ow turya bys vykken.

⁵Yn ahwer y helwis vy war an Arloedh;

ev a worthybis dhymm, ha'm gorra yn tyller ledan.

⁶Yma an Arloedh a-barth dhymm; ny borthav own.

Pandr'a yll den dhe wul dhymm?

⁷Yma an Arloedh a-barth dhymm gans ow gweresoryon;

rakhenna y hwelav ow mynnas war an re a'm kas.

⁸Gwell yw hwilas skovva y'n Arloedh

ages gorra fydhyans yn mab-den.

⁹Gwell yw hwilas skovva y'n Arloedh

ages gorra fydhyans yn pennsevigyon.

¹⁰An kenedhlow oll a hesyas a-dro dhymm;

mes yn hanow an Arloedh my a wra aga distrui.

¹¹I a hesyas a-dro dhymm, devri yth omsettsons a-dro dhymm;

mes yn hanow an Arloedh my a wra aga distrui

¹²I a hesyas a-dro dhymm avel gwenen;

i a dhewis avel tan a dhreyn;

rag yn hanow an Arloedh my a wra aga distrui.

¹³Ty re'm herdhyas yn feur rag may koetthiv,

mes an Arloedh a'm gweresas.

¹⁴An Arloedh yw ow nerth ha'm kan,

hag ev re dheuth ha bos selwyans dhymm.

¹⁵Yma lev lowender ha selwyans yn tyldow an re wiryon;

leuv dhyghow an Arloedh a wra taklow galloesek.

¹⁶Leuv dhyghow an Arloedh yw ughelhes;

leuv dhyghow an Arloedh a wra taklow galloesek.

¹⁷Ny vydhav marow, mes bew,

ha derivas gwriansow an Arloedh.

¹⁸An Arloedh re'm kessydhyas yn tynn,

mes ny'm ros dhe'n mernans.

¹⁹Igor dhymm an porthow a ewnder,

yth av a-ji dhedha

ha grassa dhe'n Arloedh.

²⁰Hemm yw porth an Arloedh;

yth a an re wiryon a-ji dhodho.

²¹My a ras dhis, rag ty re worthybis dhymm

ha ty re dheuth ha bos ow selwyans.

²²An men a skonyas an weythoryon

re dheuth ha bos pennmen an korn.

²³Hemm yw gwrians an Arloedh;

marthys yw yn agan dewlagas.

²⁴Hemm yw an jydh re wrug an Arloedh;

ni a lowenha ha bos heudhik ynno.

²⁵Gwra selwel lemmyn, ni a'th pys, A Arloedh.

A Arloedh, ni a'th pys, dannvon lemmyn sewenyans.

²⁶Benniges yw neb a dheu yn hanow an Arloedh.

Ni re'gas bennigas dhiworth chi an Arloedh.

²⁷Duw yw an Arloedh,

neb re ros golow dhyn.

Pareusewgh an solempnita gans skorrennow,

hag yskynnewgh dhe gern an alter.

²⁸Ty yw ow Duw, ha my a ras dhis;

ty yw ow Duw ha my a'th ughelha.

²⁹Grassewgh dhe'n Arloedh, rag da yw,

rag y dregeredh a dhur bys vykken.