Read the Bible

¹Fast yw ow holonn, A Dhuw;

my a gan hag a wormel

ynwedh y'm gordhyans.

²Difun, ty delynn, ha'n sowtri;

my a vynn difuna orth dydh-tardh.

³My a'th wormel, A Arloedh, yn mysk an poblow,

ha kana gormola dhis yn mysk an kenedhlow.

⁴Rag dha dregeredh yw meur a-ugh an nevow,

ha'th wiryonedh a dhrehedh dhe'n kommol.

⁵Bydh ughelhes, A Dhuw, a-ugh an nevow,

ha bedhes dha wolewder dres oll an norvys.

⁶Rag may fo dha garadowyon delivrys,

gwra agan selwel dre dha leuv dhyghow, ha klew vy.

⁷Duw re gewsis yn y sansoleth:

‘My a lowenha, ha ranna Shekem,

ha musura nans Sukkoth.

⁸Gilead yw dhymm; Manasse yw dhymm,

hag Efraym yw nerth ow fenn.

Yuda yw ow gwelenn.

⁹Moab yw ow seth-golghi;

dres Edom y teghesav ow eskis,

war Filistia my a arm yn trygh.’

¹⁰Piw a'm dre a-berth y'n dinas krev?

Piw a'm hembronk bys yn Edom?

¹¹A ny'gan skonsys, A Dhuw?

Nyns edh yn-mes gans agan luyow.

¹²Ro dhyn gweres erbynn an eskar,

rag euver yw gweres den.

¹³Dre Dhuw y hwren ni oberi yn kolonnek;

ev yth yw neb a drett agan eskerens yn-dann y dreys.