Read the Bible

¹Gour neb yw keredhys fest yn fenowgh, hag a bes kales y gilbenn,

a vydh brewys distowgh, ha ny vydh eli.

²Pan ynkress an re wiryon, an bobel a lowenha,

mes pan y'n jeves tebelwas an rewl, an bobel a gyn.

³Neb a gar furneth a wra y das lowen,

mes neb yw koweth horys a skoell y arghans.

⁴Dre wirvreus myghtern a re faster dhe'n vro,

mes neb a wra gorholedhow poes a's distru.

⁵Gour neb a flatter y gentrevek

a les roes rag y dhewdroes.

⁶Yn offens an tebelwas yma antell,

mes an den gwiryon a gan hag a lowenha.

⁷An den gwiryon a aswonn gwiryow an voghosogyon;

ny dheur mann dhe'n tebelwas an aswonnvos ma.

⁸An skornyoryon a fagel sita,

mes an re fur a dreyl sorr dhe-ves.

⁹Mara'n jeves gour fur ken gans gour foll,

yma predheges ha skorn, ha nyns eus kalmynsi.

¹⁰Gwer woesek a gas an den divlam,

hag i a hwila bewnans an re ewnhynsek.

¹¹An den foll a leun dhiskwa y sorr,

mes an den fur a'n fronn.

¹²Mar koslow rewler orth gow,

y soedhogyon oll a vydh tebelwesyon.

¹³An den boghosek ha'n arwasker yw parow,

an Arloedh a re golow dhe dhewlagas an dhew.

¹⁴Mar kwra myghtern breusi an voghosogyon gans gwirder,

y dron a vydh fastys bys vykken.

¹⁵An welenn ha'n geredh a re furneth,

mes flogh gesys heb dyskybleth a dhre meth dh'y vamm,

¹⁶Pan sewen an debeles, kammweythres a ynkress,

mes an re wiryon a vir war aga diswrians.

¹⁷Keredh dha vab hag ev a re dhis powes;

i a re delit dhe'th enev.

¹⁸Le ma nag eus profoesa, an bobel a dewl fronn dhe-ves,

mes gwynn y vys neb a with an lagha.

¹⁹Dre eryow ny yll servyas bos dyskyblys,

rag kyn konvedh, nyns yw gostyth.

²⁰A welydh gour yw fysk yn y eryow?

Yma moy a wovenek rag foll ages rag nebonan a'n par na.

²¹Neb a jersh y servyas a'y flogholeth,

a'n kyv tont wortiwedh.

²²Gour konneryek a dhifun strif,

ha den skav dhe serri a wra lies kammweythres.

²³Goeth den a'n dre isel,

mes neb yw uvel yn spyrys a'n jevydh enor.

²⁴Keskal lader a gas y vewnans y honan,

ev a glew an molleth mes ny dhiskwa ev travyth.

²⁵Own den a sett antell,

mes neb a drest y'n Arloedh yw saw.

²⁶Lies a hwila favour rewler,

mes yth yw dhiworth an Arloedh y kyv gour gwirvreus.

²⁷Gour anewn yw tra gasadow dhe'n re wiryon,

mes an re ewnhynsek yw tra gasadow dhe'n tebelwas.