Read the Bible

¹Avel ergh yn hav ha glaw yn trevas,

yndella nyns yw enor gwiw rag foll.

²Avel golvan ow ternija, avel gwennel ow nija,

ny dheu molleth heb kaws dhe bowes.

³Hwypp rag margh, fronn rag asen,

ha gwelenn rag keyn fellyon.

⁴Na worthyp dhe foll herwydh y follneth,

poken ty ynwedh a vydh foll.

⁵Gorthyp dhe foll herwydh y follneth,

po ev a fydh fur yn y dewlagas y honan.

⁶Avel treghi an dhewdroes po eva freudh

yw dannvon messaj dre leuv foll.

⁷Diwarr den evredhek a greg yn lows:

yndella yw lavar koth yn ganow fellyon.

⁸Avel neb a gelm men yn towlbrenn

yw ri enor dhe foll.

⁹Avel spern yn dorn penn-medhow,

yndella yw lavar koth yn ganow foll.

¹⁰Avel sether neb a woli pub huni

yw neb a arveth foll po penn-medhow usi tremena.

¹¹Avel ki hag a dhehwel dh'y hwyj,

yw foll neb a dhehwel dh'y follneth.

¹²A welydh gour neb yw fur yn y dhewlagas y honan?

Yma moy govenek rag foll ages dell eus ragdho.

¹³An den diek a lever, ‘Yma lew y'n fordh!

Yma lew y'n stretow!’

¹⁴Par dell dreyl daras war y vedyneryow,

yndella y treyl den diek war y weli.

¹⁵An den diek a dhrogh y leuv y'n skudell,

ha re skwith yw dh'y dri arta dh'y anow.

¹⁶An den diek yw furra yn y dhewlagas y honan

ages seyth den a worthyp gans doethter.

¹⁷Kepar ha den a dhalghenn ki gwyls er an dhiwskovarn

yw tremenyas a vell yn kedrynn den arall.

¹⁸Avel muskok a dewl yttewi,

sethow, ha mernans,

¹⁹yndella yw neb a doell y gentrevek

hag a lever, ‘Nyns esov marnas ow kul ges!’

²⁰Rag fowt keunys, tan a verow,

ha le ma nag eus kyhwedhler, strif a hedh.

²¹Avel glowbrenn dhe regydh, ha prenn dhe dan,

yndella yw gour kavyllek dhe enowi strif.

²²Geryow hwystrer yw haval dhe demmigow sawrek;

i a yn-nans dhe rannow a-bervedh an korf.

²³Avel gwedrans ow kenna seth a bri

yw gweusyow ter ha tebel golonn.

²⁴Den spitus a dholos gans y dhiwweus

yn kettermyn ow kwitha toell a-berth ynno.

²⁵Pan gews yn kuv, na grys dhodho,

rag yma seyth tra gasadow yn y golonn.

²⁶Kynth yw y gas kudhys gans gil,

y dhroktra a vydh diskudhys y'n kuntelles.

²⁷Neb a bal pytt a goedh ynno,

ha mar rol men, ev a rol war-dhelergh warnodho.

²⁸Taves gowek a gas an re a wra aga arvedh,

ha ganow fekyl a dhre terroes.