Read the Bible

¹Ow mab, mar tegemmerydh ow geryow

ha gwitha ow gorhemmynnow avel tresor genes,

²ow kul dha skovarn hewoel dhe furneth

hag ow gidya dha golonn dhe gonvedhes;

³mar kriydh devri war-lergh galloes dissernya,

ha drehevel dha lev rag konvedhes,

⁴mara'n hwilydh avel arghans

hag assaya y gavoes avel tresor kudhys,

⁵ena ty a gonvedh own an Arloedh

ha kavoes aswonnvos a Dhuw.

⁶Rag an Arloedh a re furneth,

a'y anow y teu godhvos ha konvedhes,

⁷ev a with kusul len rag an re ewnhynsek;

ev yw skoes dhe'n re hag a gerdh yn tivlam,

⁸ow kwitha fordhow gwirvreus

hag ow kwitha fordhow y syns.

⁹Ena ty a gonvedh gwiryonedh ha gwirvreus,

hag ewnder – pub hyns da;

¹⁰rag furneth a dheu a-ji y'th holonn,

ha godhvos a vydh hweg dhe'th enev.

¹¹Doethter a with warnas;

konvedhes a wra dha witha,

¹²orth dha dhelivra dhiworth an fordh a dhrog,

dhiworth an gour hag a gews yn treus,

¹³an dus a forsak an hynsyow a ewnder

rag kerdhes y'n hynsyow a dewlder,

¹⁴neb a lowenha ow kul drog,

hag a gyv plesour yn drogober treus,

¹⁵tus yw kamm aga hynsyow

ha gwius aga fordhow.

¹⁶Furneth a'th saw dhiworth an venyn estren,

a'n estrenes ha'y geryow medhel,

¹⁷neb a forsak koweth hy yowynkneth

hag a ankev kevambos hy Duw,

¹⁸rag hy fordh a dhiyskynn dhe ankow,

ha'y hynsyow dhe spyrysyon an re varow;

¹⁹an re neb a dheu dhedhi, ny dhehwelons arta,

na ny dhrehedhons dhe hynsyow bewnans.

²⁰Rakhenna ty a gerdh yn fordh an dus vas,

ha holya hynsyow tus wiryon.

²¹Rag an re ewn a drig y'n vro,

ha'n re dhinamm a bes ynni;

²²mes an debeles a vydh terrys dhiworth an vro,

ha'n falswesyon a vydh terrys dhe-ves anedhi.