Read the Bible

¹Den diberthys dhiworth kowetha a hwila ragskeusow,

ow strivya erbynn pub kusul len.

²Ny lowenha foll yn konvedhes,

mes unnsel ow tiskwedhes brys y golonn y honan.

³Pan dheu droktra, y teu bismer ynwedh;

ha gans disenor y teu mewl.

⁴Geryow ganow gour yw dowrow down,

fenten a furneth yw gover ow resek.

⁵Nyns yw da diskwedhes faverans dhe debelwas,

na herdhya den gwiryon dhe-ves dhiworth gwirvreus.

⁶Diwweus foll a dhre strif,

ha'y anow a elow rag skorjya.

⁷Ganow foll yw y dhiswrians,

ha'y dhiwweus yw antell dh'y enev y honan.

⁸Geryow hwystrer yw haval dhe demmigow sawrek;

i a yn-nans dhe'n rannow a-bervedh.

⁹Neb yw lows yn y ober

yw broder dhe neb a dhistru.

¹⁰Hanow an Arloedh yw tour krev,

an den gwiryon a boen a-bervedh ynno hag yw saw.

¹¹Pythow an den rych yw y sita grev,

hag avel fos ughel yn y gonsayt y honan.

¹²Kyns droglamm, kolonn gour yw goethus,

mes uvelder a a-rag enor.

¹³Neb a worthyp kyns ev dhe glewes –

hemm yw follneth ha sham.

¹⁴Spyrys gour a berth kleves,

mes spyrys trogh, piw a yll y berthi?

¹⁵Brys poellek a gyv godhvos,

ha skovarn tus fur a hwila godhvos.

¹⁶Ro a wra spas rag an riyas,

hag a'n dre a-rag brasyon.

¹⁷Neb a brov y gen yn kynsa a hevel gwir,

bys pan dheffo an plentyas ha'y worthapposya.

¹⁸Tewlel prenn a worfenn disputyans,

hag ervira yntra kestrivoryon gevoethek.

¹⁹Broder hyll yw maga tiwedhyn avel sita grev,

ha kedrynna yw haval dhe varrys kastell.

²⁰A froeth y anow gour yw lenwys;

gwalghys yw gans askorr y dhiwweus.

²¹Yma mernans ha bewnans yn galloes an taves,

ha keniver a'n karro a dheber y froeth.

²²Neb a gyv gwreg a gyv tra dha,

hag ev a gyv favour a'n Arloedh.

²³An den boghosek a hwila piteth,

mes an den rych a worthyp yn harow.

²⁴Yma dhe wour kowetha a omwra bos kowetha,

mes yma gwir goweth hag a len nes ages broder.