Niverow 23
Kynsa Dargan Balaam
1Ha Balaam a leveris dhe Balak, ‘Drehav dhymm omma seyth alter, ha provia ragov omma seyth tarow ha seyth hordh.’ 2Balak a wrug dell lavarsa Balaam; ha Balak ha Balaam a offrynnas war bub alter tarow ha hordh. 3Ha Balaam a leveris dhe Balak, ‘Sav ryb dha offrynn leskys, ha my a wra mos; martesen an Arloedh a dheu dhe vetya genev; ha pypynag y tispleg dhymm my a lever dhis.’ Hag ev eth dhe ugheldir moel. 4Ha Duw a vetyas gans Balaam; neb a leveris dhodho, ‘My re arayas an seyth alter, ha my re offrynnas war bub alter tarow ha hordh.’ 5Ha'n Arloedh a worras ger yn ganow Balaam, ha leverel, ‘Dehwel dhe Balak, hag yndellma y kewsydh.’ 6Hag ev a dhehwelis dhodho, hag otta, yth esa ev ha pennsevigyon Moab oll ow sevel ryb y offrynn leskys. 7Ha Balaam a gemmeras yn-bann y gows, ha leverel,
‘A-dhiworth Aram, Balak re'm dros,
myghtern Moab a venydhyow an howldrevel:
Deus, molleth Yakob ragov,
ha deus, kuhudh Ysrael!
8Fatell allav mollethi neb na wrug Duw y vollethi?
Fatell allav kuhudha neb na guhudhas an Arloedh?
9Rag a-dhiworth penn an karregi my a's gwel,
a-dhiworth an breow my a's aspi;
otta pobel ow triga aga honan,
ha heb omrekna yn mysk an kenedhlow!
10Piw a yll nivera doust Yakob,
po rekna an peswora rann a Ysrael?
Gas vy dhe verwel mernans an re wiryon,
ha bedhes ow diwedh avel aga diwedh i!’
11Ha Balak a leveris dhe Balaam, ‘Pandr'a wrussys dhymm? My a'th kemmeras dhe vollethi ow eskerens, mes yn le henna ty re wrug aga benniga.’ 12Hag ev a worthybis, ‘A ny dal dhymm gwaytyas leverel an pyth a worr an Arloedh y'm ganow?’
Nessa Dargan Balaam
13Ha Balak a leveris dhodho, ‘Deus genev dhe gen tyller, alena may hyllydh aga gweles; ny welydh marnas an rann an moyha ogas, ha ny's gwelydh oll; ena gwra aga mollethi ragov alena.’ 14Hag ev a'n kemmeras dhe wel Sofim, dhe benn Pisga, ha drehevel seyth alter, hag offrynna tarow ha hordh war bub alter. 15Balaam a leveris dhe Balak, ‘Sav omma ryb dha offrynn leskys, ha my ow metya gans an Arloedh yn-hons.’ 16An Arloedh a vetyas gans Balaam, ha gorra ger yn y anow, ha leverel, ‘Dehwel dhe Balak, hag yndellma y kewsydh.’ 17Pan dheuth ev dhodho, otta, yth esa ow sevel ryb y offrynn leskys, ha pennsevigyon Moab ganso. Ha Balak a leveris dhodho, ‘Pandr'a leveris an Arloedh?’ 18Balaam a gemmeras yn-bann y gows ha leverel,
‘Sav, Balak, ha klew;
goslow orthiv, A vab Sippor:
19Nyns yw Duw gour, may wowleverro,
na mab-den, may koettho yn edrek.
A wrug ev leverel, ha ny'n gwra?
Po a gewsis, ha ny'n kowlwra?
20Otta, my a dhegemmeras gorhemmynn dhe venniga:
ev re bennigas, ha ny allav y dhaskelwel.
21Ny welir anewnder yn Yakob;
na ny welas ahwer yn Ysrael.
Yma an Arloedh aga Duw gansa,
hag yma garm myghtern yn aga mysk.
22Duw a's dre yn-mes a Ejyp;
i a's teves, dell hevel, kern an ojyon gwyls.
23Rag nyns eus dewinieth erbynn Yakob,
na koel erbynn Ysrael.
Lemmyn y fydh leverys a Yakob,
hag a Ysrael, “Pandr'a wrug Duw!”
24Awotta pobel a sev avel lewes,
hag a omdhrehav avel lew;
ny wrowedh bys pan dhevor an preydh,
hag eva goes an re ledhys.’
25Ha Balak a leveris dhe Balaam, ‘Na wra aga mollethi vytholl, na'ga benniga vytholl.’ 26Mes Balaam a worthybis ow leverel dhe Balak, ‘A ny leveris dhis, “Pup-tra a lever an Arloedh, henna y tal dhymm y wul”?’ 27Ha Balak a leveris dhe Balaam, ‘Deus lemmyn, my a'th kemmer dhe gen tyller; martesen y fydh plegadow dhe Dhuw ma's molletthi ragov alena.’ 28Ytho Balak a gemmeras Balaam dhe wartha Peor, hag a vir war-woeles war an gwylvos. 29Balaam a leveris dhe Balak, ‘Drehav dhymmo omma seyth alter, ha provia dhymm omma seyth tarow ha seyth hordh.’ 30Balak a wrug dell lavarsa Balaam, hag offrynna tarow ha hordh war bub alter.
Notes for verses 25–301 entry
Text notes
Numbers 23:28 an gwylvos: Ebrow Yeshimonmartesen hanow tyller. View in passage