Read the Bible

²An Arloedh yw Duw neb a berth avi, hag a gemmer dial;

dialor yw an Arloedh ha meur y sorr;

an Arloedh a gemmer dial war y eskerens,

hag ev a with y sorr erbynn y envi.

³An Arloedh yw lent ow serri, ha meur y nerth,

ha'n Arloedh ny gas mann an debeles heb kessydhyans.

Yma y fordh y'n korwyns hag y'n annawel,

ha'n kommol yw doust y dreys.

⁴Ev a geredh an mor ha'y sygha,

ha desygha an avonyow oll.

Bashan ha Karmel a wedher

ha bleujenn Lebanon a wedher.

⁵An menydhyow a dhegren a-ragdho,

ha'n bronnow a deudh:

an dor yw difeythys a-ragdho,

an norvys ha myns eus trigys ynno.

⁶Piw a yll sevel a-dherag y sorr?

Piw a yll perthi y sorr fers?

Y sorr yw dinewys yn-mes avel tan,

ha terrys dhe demmyn a-ragdho yw an karregi.

⁷Da yw an Arloedh,

dinas yn jydh anken;

hag ev a aswonn an re a drest ynno ev.

⁸Mes gans liv ow fenna ev a gowldhistru hy thyller,

hag ev a helgh y envi bys yn tewlder.

⁹Pandr'a dhevisyowgh erbynn an Arloedh?

Ev a gowldhistru;

ny sev ahwer diwweyth.

¹⁰Rag kepar ha spern kesplethennys,

ha kepar ha diwes pennow-medhow,

devorys vydhons, kepar ha sowl fest sygh.

¹¹Yma den gyllys yn-mes ahanas,

neb a dewl droktra erbynn an Arloedh,

kusulyador a sherewynsi.

Kyn fons i krev hag ynwedh lies aga niver,

hwath i a vydh treghys yn-nans, ha tremena dhe-ves.

Kyn re'th grevis,

ny wrav dha revya namoy.

¹³Ha lemmyn my a dregh dhe-ves y yew dhiworthis,

ha terri dhe-ves dha rawyow.

¹⁴Ha'n Arloedh re ros gorhemmynn y'th kever:

‘Ny vydh has dhiworth dha hanow namoy;

dhiworth chi dha dhuwow y troghav dhe-ves

an imaj gravys ha'n imaj teudh;

my a bareus dha vedh; rag ty yw distyr.’

¹⁵Awotta, war an menydhyow

treys kannas nowodhow da,

ow terivas kres!

Gwith dha dhy'goelyow, A Yuda,

kollanw dha ambosow,

rag ny dremen an tebelwas dredhos nevra namoy;

ev yw treghys dhe-ves yn tien.