Read the Bible

¹Lyver linyeth Yesu Krist mab Davydh mab Abraham.

²Abraham a dhineythis Ysak, hag Ysak a dhineythis Yakob, ha Yakob a dhineythis Yuda ha'y vreder ev. ³Yuda a dhineythis Peres ha Zera a Thamar, ha Peres a dhineythis Hesron, ha Hesron a dhineythis Aram. ⁴Aram a dhineythis Amminadab, hag Amminadab a dhineythis Nahshon, ha Nahshon a dhineythis Salmon. ⁵Salmon a dhineythis Boaz a Rahab, ha Boaz a dhineythis Obed a Ruth, hag Obed a dhineythis Yesse. ⁶Yesse a dhineythis Davydh an myghtern. Davydh a dhineythis Solomon a wreg Urri, ⁷ha Solomon a dhineythis Roboam, ha Roboam a dhineythis Abia, hag Abia a dhineythis Asaf. ⁸Asaf a dhineythis Yehoshafat, ha Yehoshafat a dhineythis Yoram, ha Yoram a dhineythis Uzzia. ⁹Uzzia a dhineythis Yoatham, ha Yoatham a dhineythis Ahaz, hag Ahaz a dhineythis Hezekia. ¹⁰Hezekia a dhineythis Manasse, ha Manasse a dhineythis Amos, hag Amos a dhineythis Yosia, ¹¹ha Yosia a dhineythis Yekonia ha'y vreder ev yn prys aga divroans dhe Babylon.

¹²Wosa an divroans dhe Babylon, Yekonia a dhineythis Shealtiel, ha Shealtiel a dhineythis Zerubbabel. ¹³Zerubbabel a dhineythis Abiud, hag Abiud a dhineythis Elyakim, hag Elyakim a dhineythis Azor. ¹⁴Azor a dhineythis Sadok, ha Sadok a dhineythis Akim, hag Akim a dhineythis Eliud. ¹⁵Eliud a dhineythis Eleazar, hag Eleazar a dhineythis Matthan, ha Matthan a dhineythis Yakob. ¹⁶Yakob a dhineythis Yosep gour Maria, may feu gensi dineythys Yesu, yw gelwys Krist.

¹⁷Ytho oll an henedhow a Abraham bys Davydh o peswardhek henedh, hag a Davydh bys an divroans dhe Babylon o peswardhek henedh: a'n divroans dhe Babylon bys Krist o peswardhek henedh.

¹⁸Dineythyans Yesu Krist o yndellma. Pan via y vamm Maria ambosys dhe Yosep, kyns i dhe dhos war-barth, yth omgavas owth omdhoen der an Spyrys Sans. ¹⁹Ha Yosep hy gour, a-ban o den ewnhynsek, ha ny vynni gul bismer dhedhi, a erviras hy gorra a-denewen yn-dann gel. ²⁰Hag ev owth ombrederi a-dro dhe'n taklow ma, awotta, el an Arloedh a omdhiskwedhas dhodho dre hunros, ow leverel, ‘Yosep mab Davydh, na borth own a gemmeres Maria yn gwreg dhis; rag an pyth usi omdhegys ynni yw der an Spyrys Sans. ²¹Hi a dhineyth mab, ha ty a'n henow Yesu; rag ev a saw y bobel dhiworth aga feghosow.’ ²²Oll henna yw hwarvedhys may fo kollenwys an dra kewsys gans an Arloedh der an profoes, ow leverel,

yw dhe styrya, Genen ni Duw. ²⁴Yosep pan dhifunas a'y gosk, a wrug par dell worhemmynnsa dhodho el an Arloedh hag a gemmeras y wreg dhodho ev, ²⁵ha ny's aswonnis bys pan dhineythis hi mab; hag ev a'n henwis Yesu.