Read the Bible

¹Ev eth yn-mes alena, ha dos yn y vro y honan; ha'y dhyskyblon a'n siwyas. ²Pan o devedhys an Sabot, ev a dhallathas dyski y'n synaga, ha lies, orth y glewes, a's teva marth, hag yn-medhons, ‘A-ble teuth dhodho an taklow ma? Ha pyth yw an furneth re beu res dhodho, ha'n oberow galloesek ma gwrys gans y dhiwla? ³A nyns yw hemma an ser prenn, mab Maria, broder Jamys ha Yoses ha Yudas ha Simon, hag a nyns usi y hwerydh omma genen?’ Ha sklandrys ens i anodho. ⁴Yn-medh Yesu dhedha, ‘Nyns yw profoes heb enor, saw yn y vro y honan, hag yn mysk y gerens y honan, hag yn y ji y honan.’ ⁵Ha ny ylli gul ena ober galloesek vytholl, marnas ev a worras y dhiwla war nebes klevyon ha'ga sawya. ⁶Ha marth o ganso drefenn aga diskryjyans.

Yth e a-dro y'n trevow, ow tyski. ⁷Ena ev a elwis dhodho an dewdhek, hag a dhallathas aga dannvon yn-mes, dew ha dew; hag ev a ros dhedha galloes war spyrysyon avlan, ⁸ha gorhemmynna dhedha, ma na gemmerrens travyth war an hyns, saw unnsel lorgh; na bara, na skryp, na mona yn aga grogys, ⁹mes bos arghenys gans sandalyow; na gwiska diw bows. ¹⁰Yn-medh ev dhedha, ‘Pyle pynag yth yllowgh a-bervedh yn unn chi, ena trigewgh bys pan omdennowgh alena. ¹¹Ha py tyller pynag na vynno agas degemmeres, na'gas klewes, pan yllowgh alena, shakyewgh dhe-ves an doust a-dhann agas treys yn dustuni er aga fynn.’ ¹²Ytho yth ethons yn-kerdh ha pregoth, may koettha tus yn edrek. ¹³I a dewlis yn-mes lies dyowl, hag untya gans olew lies o klav, ha'ga sawya.

¹⁴Lemmyn myghtern Herod a glewas anodho, rag y hanow o aswonnys a-les, hag i a leveri, ‘Yowann Besydhyer yw sevys a'n re varow, ha dre henna yma an oberow galloesek owth oberi ynno ev.’ ¹⁵Re erell a leveri, ‘Ev yw Elias’; mes re erell a leveri, ‘Profoes yw, avel onan a'n brofoesi.’ ¹⁶Mes Herod pan glewas a leveris, ‘Yowann yw, neb a wrugavy y dhibenna; dasserghys yw a'n re varow.’

¹⁷Rag Herod y honan a dhannvonsa dhe dhalghenna yn Yowann ha'y gelmi yn prison a-barth Herodias, gwreg y vroder Felip, rag ev a's demmedhsa; ¹⁸rag yth esa Yowann ow leverel dhe Herod, ‘Nyns yw lafyl ty dhe gemmeres gwreg dha vroder.’ ¹⁹Rakhenna Herodias a borthas avi er y bynn, hag a vynna y ladha, mes ny ylli; ²⁰rag Herod a'n jeva own a Yowann, ow kodhvos y vos gour ewn ha sans, hag ev a'n gwitha saw. Pan y'n klewas yth o ankresys bras, mes ev a'n goslowi yn lowen. ²¹Pan o devedhys dydh gwiw, Herod a wrug gwledh yn y benn-bloedh dh'y dus vras, dh'y benn-kaptenyon ha dhe welhevin Galile; ²²ha pan dheuth a-ji myrgh an Herodias na ha donsya, hi a blesyas Herod ha'n re esedhys ganso. Yn-medh an myghtern dhe'n voren, ‘Govynn orthiv pypynag a vynni ha my a'n gront dhis.’ ²³Ev a'n tos dhedhi, ‘Pypynag oll a wovynni orthiv my a'n gront dhis, bys yn hanter ow gwlaskor.’ ²⁴Hi eth yn-mes ha leverel dh'y mamm, ‘Pandr'a wrav orto govynn?’ Ha hi a leveris, ‘Penn Yowann an besydhyer.’ ²⁵A-dhesempis hi a dheuth a-bervedh toeth da dhe'n myghtern ha govynn, ow leverel, ‘My a vynn ty dhe ri dhymm dison war dallyour penn Yowann Baptyst.’ ²⁶Ha grevys fest o an myghtern; byttegyns drefenn y di, ha rag an re o esedhys ganso, ny vynna hy skonya. ²⁷A-dhesempis an myghtern a dhannvonas korfwithyas, hag a worhemmynnis may fe dres y benn: henna eth ha'y dhibenna y'n prison. ²⁸Ev a dhros y benn war dallyour, ha'y ri dhe'n voren ha'n voren a'n ros dh'y mamm. ²⁹Ena y dhyskyblon, pan glewsons henna, a dheuth ha kemmeres y gorf, ha'y worra yn bedh.

³⁰An abesteli a omguntellas a-dro dhe Yesu hag a dherivas dhodho pup-tra a wrussens gul ha dyski. ³¹Yn-medh ev dhedha, ‘Dewgh hwi agas honan yn priva bys yn tyller difeyth ha powes pols.’ Rag yth esa lies ow tos hag ow mos, hag i ny's tevo spas rag dybri. ³²Ytho i a omdennas y'n skath bys yn tyller difeyth, yn priva. ³³Mes lies a's gwelas owth omdenna, ha's aswonnis, hag i a boenyas a-droes di dhiworth pub sita, ha dos ena a-ragdha. ³⁴Pan dheuth yn-mes, ev a welas routh veur, ha truedh a'n jeva anedha, rag yth ens avel deves heb bugel; hag ev a dhallathas dyski dhedha lies tra. ³⁵Lemmyn pan o an eur seulabrys diwedhes, y dhyskyblon a dheuth dhodho ha leverel, ‘Hemm yw tyller difeyth, ha lemmyn diwedhes yw an eur; ³⁶gwra aga gasa dhe vos, mayth ellons y'n pow hag y'n trevow a-dro, ha prena dhedha aga honan neppyth dhe dhybri.’ ³⁷Mes ev a worthybis ha leverel dhedha, ‘Rewgh hwi dhedha may tepprons.’ Hag yn-medhons dhodho, ‘A wren ni mos dhe brena bara a dhew kans denarius, ha ri dhedha dhe dhybri?’ ³⁸Mes yn-medh ev dhedha, ‘Py lies torth eus genowgh? Ewgh dhe weles.’ Ha pan wodhvons, i a leveris ‘Pymp, ha dew bysk.’ ³⁹Ev a worhemmynnis may hwrellens gul dhedha esedha oll yn bagasow war an gwyrwels. ⁴⁰I a esedhas yn renkow, yn kansow hag yn hanter-kansow. ⁴¹Wosa ev dhe gemmeres an pymp torth ha'n dhew bysk, ev a viras yn-bann dhe nev, ha benniga, terri an torthow, ha'ga ri dh'y dhyskyblon dhe worra a-ragdha, ha'n dhew bysk ev a's rannas yntredha oll. ⁴²I a dhybris yn kettep penn, ha lenwys vons. ⁴³Hag i a gemmeras yn-bann dewdhek kanstellas leun a'n brewyon hag a'n puskes. ⁴⁴Yth o an re a dhybris an torthow pymp mil wour.

⁴⁵Hware ev a wrug dh'y dhyskyblon mos a-bervedh y'n skath ha mos dhe'n tu arall bys yn Bethsaida, hag ev ow tannvon an routh dhe-ves. ⁴⁶Wosa ev dhe asa farwell dhedha, ev a omdennas dhe'n menydh rag pysi.

⁴⁷Devedhys an gorthugher, yth esa an skath yn kres an mor, hag ev y honan war an tir. ⁴⁸Ev a's gwelas hag i ow kwinnel yn-dann roevya, rag bos an gwyns er aga fynn; hag a-dro dhe beswora goel an nos, ev a dheuth dhedha ow kerdhes war an mor hag a vynnsa tremena dresta. ⁴⁹Mes pan y'n gwelsons ow kerdhes war an mor, i a dybis y vos tarosvann, hag i a armas; ⁵⁰rag i a'n gwelas yn kettep onan hag euth esa dhedha. Mes hware ev a gewsis gansa ha leverel dhedha, ‘Gwellhewgh agas cher, my yw; na berthewgh own.’ ⁵¹Ena ev eth bys dhedha a-bervedh y'n skath; ha'n gwyns a hedhis. Marth bras dres musur a's teva yntredha aga honan, ha sowdhenys ens i; ⁵²rag ny wrussons konvedhes a-dro dhe'n torthow, mes aga holonn o kaleshes.

⁵³Wosa tremena dhe'n tu arall, i a dheuth dhe'n tir yn Gennesaret, hag fastya. ⁵⁴Pan esens ow tos yn-mes a'n skath, a-dhesempis an dus a'n aswonnis. ⁵⁵I a boenyas a-derdro yn oll an pow na, ha dalleth doen an glevyon a-dro yn gravathow py le pynag y klewsons y vos ev. ⁵⁶Ha plepynag yth entra ev, yn trevow, po yn sitys, po yn gwelyow, i a worras an glevyon y'n marghasow, ha'y bysi may tocchyens kyn fe ma's pilenn y vantell; ha kekemmys a's tochyas a veu sawys.