Read the Bible

¹Ev a entras arta dhe'n synaga; hag yth esa den ena, gwedhrys y leuv, ²hag i a aspia gluw orto, mar kwrella y yaghhe y'n Sabot, may hallens y guhudha. ³Ev a leveris dhe'n den gwedhrys y leuv, ‘Sav y'n kres.’ ⁴Hag yn-medh ev dhedha, ‘Pyneyl yw lafyl, po gul da y'n Sabot, po gul drog, sawya bewnans po ladha?’ Mes i a dewi. ⁵Ha wosa ev dhe vires a-dro orta gans sorr, hag ev grevys drefenn kaletter aga holonn, yn-medh ev dhe'n den, ‘Ystynn dha leuv.’ Ev a's ystynnas, ha'y leuv a veu restorys. ⁶An Fariseow eth yn-mes, ha dison i a omgusulyas gans an Herodianys er y bynn, fatell allens y dhistrui.

⁷Ena Yesu a omdennas gans y dhyskyblon war-tu ha'n mor, ha routh veur a Alile a'n holyas, hag a Yudi; ⁸ha routh veur a Yerusalem, a Idumea, a'n pow a'n tu arall dhe'n Yordan, ha'n pow a-dro dhe Tyr ha Sidon, wosa i dhe glewes a bup-tra a veu gwrys ganso, a dheuth dhodho. ⁹Ev a leveris dh'y dhyskyblon, may fe skath vyghan parys ragdho drefenn an routh, ma na wrellens y waska; ¹⁰rag ev a wrussa sawya lies, mayth esa kemmys a's teva plagys ow kwaska warnodho rag y dochya. ¹¹Ha'n spyrysyon avlan, pan y'n gweli, a goedha dhe'n dor a-dheragdho, yn unn arma, ow leverel, ‘Ty yw Mab Duw.’ ¹²Mes a erghis dhedha yn straght ma na wrellens y dhiskudha.

¹³Ena ev eth yn-bann y'n menydh, hag a elwis dhodho an re a vynnas ev; hag i a dheuth dhodho. ¹⁴Ev a apoyntyas dewdhek, neb a henwis abesteli, may fens ganso, ha may halla ev aga dannvon yn-mes rag pregoth, ¹⁵ha may fe dhedha galloes a yaghhe klevesow ha tewlel yn-mes dywolow: ¹⁶dhe Simon ev a ros an hanow Peder; ¹⁷dhe Jamys mab Zebede, ha Yowann broder Jamys ev a ros an hanow Boanerges, henn yw, Mebyon Taran; ¹⁸hag Androw ha Felip, ha Bertyl, ha Matthew, ha Tommas ha Jamys mab Alfeus, ha Thaddeus, ha Simon an Kananyas; ¹⁹ha Yudas Skaryoth neb a wrug ynwedh y drayta.

²⁰Ev eth a-bervedh yn chi, hag yth esa an routh owth omguntell arta, ma na yllens kemmys ha dybri bara. ²¹Pan glewas y gerens henna, i eth yn-mes rag settya dalghenn ynno; rag i a leveri, ‘Varyes yw.’ ²²Ha'n skribys neb a dheuth yn-nans a Yerusalem a leveri, ‘Yma ganso Belzebul, ha dre bryns an dhywolow ymava ow tewlel yn-mes dywolow.’ ²³Ytho ev a's gelwis dhodho ha kewsel orta dre barabolennow, ‘Fatell yll Satnas tewlel Satnas yn-mes? ²⁴Mar pydh gwlaskor rynnys er hy fynn hy honan, an wlaskor na ny yll sevel; ²⁵mar pydh chi rynnys er y bynn y honan, an chi na ny yll sevel; ²⁶ha Satnas mar kwrug ev sevel er y bynn y honan ha bos rynnys, ny yll ev sevel, mes yma dhodho diwedh. ²⁷Mes ny yll denvyth entra dhe ji den krev, ha pylla y byth, marnas ev a golmo kyns oll an den krev; hag ena ev a byll y ji.

²⁸‘Yn hwir y lavarav dhywgh, oll aga feghosow a vydh gevys dhe vebyon tus, ha'n blasfemiow kemmys a wrellons; ²⁹mes neb a wrello blasfemi erbynn an Spyrys Sans ny'n jevydh gevyans bynitha, mes yw kablus a beghes dibenn’ ³⁰– drefenn i dhe leverel, ‘Yma spyrys avlan dhodho.’

³¹Y vamm ha'y vreder a dheuth, hag ow sevel a-ves i a dhannvonas dhodho, orth y elwel. ³²Ha routh o esedhys a-dro dhodho, hag yn-medhons dhodho, ‘Mir, yma dha vamm ha'th vreder a-ves orth dha hwilas.’ ³³Ev a's gorthybis ow leverel, ‘Piw yw ow mamm ha'm breder?’ ³⁴Hag ow mires a-dro orth an re o esedhys yn y gyrghynn, yn-medh ev, ‘Ottomma ow mamm ha'm breder! ³⁵Rag neb a wrello bodh Duw, an keth henna yw ow broder, ha'm hwoer, ha'm mamm.’