Read the Bible

¹Y hwarva y'n dydhyow na, y feu ordenans dyllys dhiworth Sesar Awgustus, oll an bys dhe vos kovskrifys. ²An kovskrif ma, an kynsa, a hwarva pan veu Kwirinius governour Syria. ³Yth esa pub huni ow mos dhe vos niverys, peub dh'y sita y honan. ⁴Ha Yosep ynwedh eth yn-bann dhiworth Galile, yn-mes a'n sita Nazareth, dhe Yudi, dhe sita Davydh, Bethlehem y hanow, rag ev dhe vos a ji hag a linyeth Davydh, ⁵dhe vos kovskrifys war-barth gans Maria, ambosys dhodho yn demmedhyans, ha hi gans flogh. ⁶Pan esens ena, kowlwrys veu an dydhyow rag hi dhe dhineythi, ⁷ha hi a dhineythis hy mab kynsa-genys, ha'y vaylya yn lystennow, ha'y worra a'y wrowedh yn presep, rag nag esa le ragdha y'n ostel.

⁸Lemmyn yth esa bugeledh y'n pow na, trigys y'n goenyow, ow koelyas dre nos dhe witha aga flokk. ⁹Ena, el an Arloedh a sevis a-dheragdha, ha golewder an Arloedh a splannas a-dro dhedha, hag own bras a's teva. ¹⁰Ha'n el a leveris dhedha, ‘Na berthewgh own, rag otta, my a dhre dhywgh nowodhow da a lowena veur hag a vydh rag oll an bobel, ¹¹bos genys ragowgh hedhyw Selwyas, neb yw Krist an Arloedh, yn sita Davydh. ¹²Ha hemm yw an tokyn dhywgh: hwi a gyv baban maylys yn lystennow hag a'y wrowedh yn presep.’ ¹³Ha distowgh yth esa gans an el routh veur a'n lu nevek ow kormel Duw, hag ow leverel,

¹⁵Ena, wosa an eledh dhe dhiberth dhiworta bys yn nev, yth esa an vugeledh ow leverel an eyl dh'y gila, ‘Deun ni lemmyn dhe Bethlehem ha gweles an dra ma yw hwarvedhys, a wrug an Arloedh y dhiskwedhes dhyn.’ ¹⁶Hag i a dheuth yn unn fyski ha kavoes Maria ha Yosep, ha'n baban a'y wrowedh y'n presep. ¹⁷Pan y'n gwelsons, i a dherivas an dra a veu leverys dhedha a-dro dhe'n flogh ma. ¹⁸Ha myns a'n klewas a's teva marth a'n taklow derivys dhedha gans an vugeledh. ¹⁹Mes Maria a witha oll an taklow ma, owth ombrederi yn hy holonn. ²⁰An vugeledh a dhehwelis, ow kordhya hag ow kormel Duw, a bup-tra a glewsens ha gweles, kepar dell veu leverys dhedha.

²¹Pan esa eth dydh kowlwrys rag y drodreghi, ev a veu henwys Yesu, an hanow res gans an el kyns ev dhe vos konsevys y'n brys.

²²Pan veu kowlwrys dydhyow aga glanheans herwydh lagha Moyses, i a'n dros yn-bann dhe Yerusalem rag y brofya dhe'n Arloedh, ²³(dell yw skrifys yn lagha an Arloedh, ‘Pub gorow a iger an brys a vydh gelwys sans dhe'n Arloedh’), ²⁴ha dhe offrynna sakrifis war-lergh an pyth yw leverys yn lagha an Arloedh, ‘Kopel a durennow po diw golommenn yowynk.’

²⁵Hag otta, yth esa den yn Yerusalem, Simeon y hanow, ha'n den ma o ewnhynsek ha len, ow kortos konfort Ysrael, hag yth esa an Spyrys Sans warnodho. ²⁶Ha re bia diskwedhys dhodho gans an Spyrys Sans na weli ankow kyns ev dhe weles an Krist a'n Arloedh. ²⁷Ev a dheuth der an Spyrys y'n tempel; ha'n gerens pan dhrosons an flogh Yesu a-ji rag gul ragdho war-lergh usadow an lagha, ²⁸ev a'n kemmeras yn y dhiwvregh, ha benniga Duw ha leverel,

³³Y das ha'y vamm a's tevo marth a'n lavarow o kewsys yn y gever. ³⁴Ha Simeon a's bennigas ha leverel dhe Varia y vamm, ‘Otta, an flogh ma yw settys rag koedha ha sevel lies yn Ysrael, ha rag tokyn a vydh gorthenebys ³⁵– ha kledha a wan dha enev jy ynwedh – may fo diskwedhys prederow lies kolonn.’

³⁶Hag yth esa profoeses, Anna, myrgh Fanuel, a loeth Asher. Hi o gyllys pell yn dydhyow pals, ha re vewsa gans gour seyth blydhen a-dhia hy gwyrghsys, ³⁷ha hi gwedhwes bys peswar bloedh ha peswar-ugens, neb na dhiberthi dhiworth an tempel, ow servya gans penys heb dybri ha pysadow dydh ha nos. ³⁸Ha hi a dheuth nes y'n pols na ha grassa dhe Dhuw, ha kewsel anodho dhe beub a worta daspren Yerusalem.

³⁹Wosa kowlwul pup-tra herwydh lagha an Arloedh, i a dhehwelis dhe Alile, dh'aga sita aga honan Nazareth. ⁴⁰Ha'n flogh a devi brassa ha kreffa, lenwys a furneth, hag yth esa gras Duw warnodho.

⁴¹Lemmyn y gerens e dhe Yerusalem pub blydhen dhe woel an Pask. ⁴²Ha pan veu ev dewdhek bloedh, i eth yn-bann war-lergh usadow an goel; ⁴³ha wosa kowlwul an dydhyow, hag i ow tehweles, an flogh Yesu a wortas yn Yerusalem, ha ny'n godhya y gerens. ⁴⁴Ow tybi y vos y'n kowethyans, wosa mos pellder unn jydh i a'n hwila yn mysk an neskerens ha'n gothmans, ⁴⁵ha pan na'n kavsons, i a dhehwelis dhe Yerusalem, orth y hwilas. ⁴⁶Ena wosa tri dydh, i a'n kavas y'n tempel, esedhys yn mysk an dhyskadoryon, ow koslowes orta hag ow kovynn orta; ⁴⁷hag yth esa marth gans peub a'n klewo, a'y gonvedhes ha'y worthybow. ⁴⁸Pan y'n gwelsons, sowdhenys vons i, ha'y vamm a leveris dhodho, ‘Flogh, prag y'gan dyghtsys yndella? Otta, dha das ha my re beu orth dha hwilas yn ahwer.’ ⁴⁹Ev a leveris dhedha, ‘Prag y'm hwilewgh? A ny wodhvewgh bos res my dhe vos yn chi ow Thas?’ ⁵⁰Mes ny gonvedhsons an pyth a leveris dhedha. ⁵¹Ena ev eth yn-nans gansa ha dos dhe Nazareth, hag ev o gostyth dhedha. Ha'y vamm a witha oll an lavarow ma yn hy holonn.

⁵²Ha Yesu a devi yn furneth ha blydhynyow, hag yn gras gans Duw ha tus.