Read the Bible

¹An Arloedh a gewsis orth Moyses ow leverel, ²Kows orth mebyon Ysrael ow leverel: Mar pegh neb den heb y wodhvos erbynn onan a worhemmynnow an Arloedh, ow kul neppyth na dal bos gwrys, ³mars yw an oferyas untys neb a begh, yndella ow kul an bobel dhe vos kablus, dres ev dhe'n Arloedh rag y begh re wrug ev tarow yowynk heb namm, rag offrynn pegh. ⁴Ev a dhre an tarow dhe dharas tylda an kuntelles dherag an Arloedh ha gorra y leuv war benn an tarow ha ladha an tarow dherag an Arloedh. ⁵An oferyas untys a gemmer rann a woes an tarow ha'y dhri dhe dylda an kuntelles. ⁶An oferyas a drogh y vys y'n goes ha skoellya rann a'n goes seythgweyth dherag an Arloedh, a-rag vayl an sentri. ⁷An oferyas a worr rann a'n goes war gern alter an ynkys hweg dherag an Arloedh usi yn tylda an kuntelles, ha dinewi oll goes an tarow war woeles alter an offrynn leskys, orth daras tylda an kuntelles. ⁸Ev a gemmer dhiworto an blonek oll a darow an offrynn pegh, an blonek a worher an pottys hag oll an blonek usi war an pottys, ⁹ha'n dhiwloneth ha'n blonek usi warnedha usi ogas dhe'n dhiwglun, ha stagell an avi ev a gemmer dhe-ves gans an dhiwloneth, ¹⁰kepar dell yw kemmerys dhiworth tarow sakrifis an offrynnow kowethyans; ha'n oferyas a's lesk war alter an offrynn leskys. ¹¹Kneus an tarow hag oll y gig gans y benn ha'y arrow ha'y bottys ha'y gawgh – ¹²an tarow dien, ev a'n kemmer yn-mes a'n kamp dhe dyller glan mayth yw an lusu dinewys, ha'y leski war dan a brenn. Ev a vydh leskys le mayth yw an lusu dinewys.

¹³Mar pegh kuntelles kowal Ysrael heb y wodhvos, ha kelys yw an dra dhiworth lagasow an gemmynieth, ha mar kwrussons neppyth erbynn neb onan a worhemmynnow an Arloedh, taklow na dal bos gwrys, ha mars yns i kablus; ¹⁴pan vo godhvedhys an pegh re wrussons, an gemmynieth a dhre tarow yowynk avel offrynn pegh, ha'y dhri dherag tylda an kuntelles. ¹⁵Henavogyon an kuntelles a worr aga diwleuv war benn an tarow dherag an Arloedh, ha'n tarow a vydh ledhys dherag an Arloedh. ¹⁶An oferyas untys a dhre rann a woes an tarow dhe dylda an kuntelles, ¹⁷ha'n oferyas a drogh y vys y'n goes ha'y skoellya seythgweyth dherag an Arloedh dherag an vayl. ¹⁸Ev a worr rann a'n goes war gern an alter usi dherag an Arloedh, usi yn tylda an kuntelles, ha dinewi oll an goes war woeles alter an offrynn leskys, orth daras tylda an kuntelles. ¹⁹Ev a gemmer oll y vlonek dhiworto ha'y leski war an alter, ²⁰hag ev a wra gans an tarow kepar dell wrug gans an tarow rag an offrynn pegh; yndella y hwra ev gans hemma. An oferyas a wra dehwelyans ragdha, ha gevys vydh dhedha. ²¹Ev a gemmer an tarow yn-mes a'n kamp ha'y leski dell loskas an kynsa tarow. Offrynn pegh yw rag an gemmynieth.

²²Pan begh rewler ha gul neppyth heb y wodhvos erbynn neb onan a worhemmynnow an Arloedh y Dhuw, taklow na dal bos gwrys, ha kablus yw, ²³po mar teu an pegh re wrug ev dh'y wodhvos, ev a dhre y offrynn, bogh, gorow heb namm, ²⁴hag ev a worr y leuv war benn an bogh ha'y ladha y'n tyller may ladhons an offrynn leskys dherag an Arloedh. Offrynn pegh yw. ²⁵An oferyas a gemmer rann a woes an offrynn pegh gans y vys ha'y worra war gern alter an offrynn leskys ha dinewi y woes war woeles alter an offrynn leskys. ²⁶Ev a lesk oll y vlonek war an alter kepar ha blonek sakrifis an offrynnow kowethyans, ha'n oferyas a wra dehwelyans ragdho rag y begh, ha gevys vydh dhodho.

²⁷Mar pegh nebonan a bobel an pow heb y wodhvos, ow kul neppyth erbynn gorhemmynnow an Arloedh, taklow na dal bos gwrys, ha kablus yw, ²⁸pan dheu dh'y wodhvos an pegh re beghas, ev a dhre y offrynn, mynn a'n gever, onan benow heb namm, rag y begh re beghas. ²⁹Ev a worr y leuv war benn an offrynn pegh ha ladha an offrynn pegh yn tyller an offrynn leskys. ³⁰An oferyas a gemmer rann a'y woes gans y vys ha'y worra war gern alter an offrynn leskys, ha dinewi oll an goes war woeles an alter. ³¹Ev a gemmer dhe-ves oll y vlonek, dell yw an blonek kemmerys dhe-ves dhiworth sakrifis an offrynnow kowethyans, ha'n oferyas a'n lesk war an alter, sawer plegadow dhe'n Arloedh. Ytho an oferyas a wra dehwelyans ragdho, ha gevys vydh dhodho.

³²Mar tre oen avel offrynn pegh, ev a dhre onan benow heb namm. ³³Ev a worr y leuv war benn an offrynn pegh, ha'y ladha rag offrynn pegh y'n tyller may ladhons an offrynn leskys. ³⁴An oferyas a gemmer rann a woes an offrynn pegh gans y vys ha'y worra war gern alter an offrynn leskys, ha dinewi oll an goes war woeles an alter. ³⁵Ev a gemmer dhe-ves oll an blonek dell yw kemmerys blonek an oen dhiworth sakrifis an offrynnow kowethyans, ha'n oferyas a'n lesk war an alter, gans an offrynnow gwrys dre dan dhe'n Arloedh. An oferyas a wra dehwelyans rag y begh re wrug ev, hag y fydh gevys dhodho.