Read the Bible

¹Porth kov, A Arloedh, a'n pyth re goedhas dhyn;

mir ha gweles agan meth.

²Agan ertach re beu treylys dhe estrenyon,

agan chiow dhe alyons.

³Omdhivasow re beun heb tas;

agan mammow yw kepar ha gwedhwesow.

⁴Ni re evas agan dowr a bris arghans;

agan keunys a dheu dre varghadoryon.

⁵An yew war agan konna yw poes warnan;

ni a lavur, nyns eus dhyn powes vyth.

⁶Dhe Ejyp ni a ros leuv,

ha dhe Assyria, rag kavoes bara lowr.

⁷Agan tasow re beghas, ny vewons hwath;

ni re beu beghys gans aga drogoberow.

⁸Kethyon a'gan rewl;

nyns eus neb a'gan delirv dhiworth aga dorn.

⁹Ni a gyv agan bara yn peryll a'gan bewnans,

drefenn an kledha y'n difeythtir.

¹⁰Agan kroghen yw poeth kepar ha forn

drefenn poethvann divoetter.

¹¹Benynes yw defolys yn Sion,

gwyrghesow yn sitys Yuda.

¹²Pennsevigyon yw kregys der aga diwla;

nyns yw fasow henavogyon enorys.

¹³Gwer yowynk yw konstrynys dhe'n melinyow,

ha mebyon a drebuch yn-dann veghyow keunys.

¹⁴Tus koth re asas an porth,

tus yowynk aga menestrouthi.

¹⁵Difygys yw joy agan kolonn;

treylys dhe gynvann yw agan karoli.

¹⁶Koedhys yw an gurun dhiworth agan penn;

go-ni, rag ni re beghas!

¹⁷Rakhenna devedhys ha bos klav yw agan kolonn,

rakhenna tewlhes yw agan dewlagas,

¹⁸rag menydh Sion, hag yw ynyal;

owrgeun a gerdh warnodho.

¹⁹Ty, A Arloedh, a dhur bys vykken;

dha se a bes a henedh dhe henedh.

²⁰Prag y hwre'ta agan ankevi bys vykken,

agan forsakya pub dydh oll?

²¹Gwra agan restorya dhis, A Arloedh, may tehwellyn;

nowydhha agan dydhyow kepar dell vons seuladhydh –

²²po a wruss'ta devri agan denagha yn tien?

A wruss'ta serri orthyn dres musur?