Read the Bible

²‘Pan ledyas ledyoryon yn Ysrael,

pan ombrofyas an bobel –

bennigewgh an Arloedh!

³‘Klewewgh, A vyghternedh, goslowewgh, A bennsevigyon;

dhe'n Arloedh y kanav,

my a gan gormola dhe'n Arloedh, dhe Dhuw Ysrael.

⁴‘ Arloedh, pan ythys yn-mes a Seir,

pan geskerdhsys dhiworth gwel Edom,

an dor a grysyas,

ha'n ebron a dhiveris,

an kommolennow ynwedh a dhiveris dowr.

⁵An menydhyow a grysyas a-rag an Arloedh, an Sinay ma,

a-rag an Arloedh, Duw Ysrael.

⁶‘Yn dydhyow Shamgar mab Anath

yn dydhyow Yael, fordhow-meur a hedhis

ha tremenysi a dremena war fordhow gwius.

⁷An werin a hedhis yn Ysrael,

i a hedhis

bys pan sevsys, Debora,

avel mamm yn Ysrael y sevsys.

⁸Pan o dewisys duwow nowydh,

ena yth esa bresel y'n yetow.

A veu dhe weles po skoes po guw

yn mysk dew-ugens yn Ysrael?

⁹Ow holonn a dhe gaslewydhyon Ysrael

hag a ombrofyas a'ga bodh yn mysk an bobel.

Bennigewgh an Arloedh.

¹⁰‘Derivewgh anodho, hwi hag a varghogeth war asenes gellvelyn,

hwi hag a esedh war ballennow-diber fethus

ha hwi hag a gerdh ryb an fordh.

¹¹Dhe son kanoryon orth an dowrvaow,

ena i a dhaslever tryghow an Arloedh,

tryghow y werin yn Ysrael.

‘Ena yn-nans dhe'n yetow y keskerdhas pobel an Arloedh.

¹²‘Difun, difun, Debora!

Difun, difun, dyllo kan!

Sa'bann, Barak, led dha brisnoryon dhe-ves,

A vab Abinoam.

¹³Ena remenant an ugheloryon a geskerdhas yn-nans,

pobel an Arloedh a geskerdhas yn-nans ragdho erbynn an re alloesek.

¹⁴A Efraym i eth yn-mes y'n nans,

orth dha holya, Benyamin, gans dha bobel.

A Makir an gaslewydhyon a geskerdhas,

hag a Zebulun an re hag a dheg lorgh an kaslewydh;

¹⁵pennsevigyon Yssakar a dheuth gans Debora,

hag Yssakar lel dhe Barak;

y'n nans y poensons orth y dhew seudhel.

Yn mysk kordhow Rewben

yth esa hwithrans meur a golonnow.

¹⁶Prag yth hokyewgh yn mysk korlannow an deves?

rag klewes an piba rag an greow?

Yn mysk kordhow Rewben

yth esa hwithrans meur a golonnow.

¹⁷Gilead a bowesas dres an Yordan;

ha Dan, prag y triga ev gans an gorholyon?

Asher a esedha stag orth an arvor,

ow triga ryb y ankorvaow.

¹⁸Zebulun yw pobel hag a skornyas mernans;

Naftali ynwedh, war ugheldiryow an mes.

¹⁹‘Myghternedh a dheuth, i a omladhas;

ena myghternedh Kanan a omladhas

yn Taanak, ryb dowrow Megiddo;

ny gemmersons preydh a arghans.

²⁰An ster a omladhas dhiworth nev,

dhiworth aga resegvaow i a omladhas erbynn Sisera.

²¹An keynres Kishon a's skubas dhe-ves,

an keynres a's lettyas a dhiank, an keynres Kishon.

Keskerdh yn-rag, ow enev, gans nerth!

²²‘Ytho yn ughel y hweskis karnow an vergh

gans an peswarlemmel, peswarlemmel an stedys krev.

²³‘Molleth Meroz, a lever el an Arloedh,

molleth yn hwerow y annedhysi,

rag na dheuthons dhe weres an Arloedh,

dhe weres an Arloedh erbynn an re alloesek.

²⁴‘An moyha benniges a venynes re bo Yael,

gwreg Heber an Kenyas,

a venynes annedhysi yn tyldow an moyha benniges.

²⁵Ev a bysis dhiworti dowr ha hi a ros dhodho leth,

hi a dhug dhodho kowles yn bolla gwiw dhe arloedh.

²⁶Hi a worras hy dorn dhe'n ebil-tylda

ha'y leuv dhyghow dhe vorthol gweythoryon;

hi a weskis Sisera,

hi a gropyas y benn,

hi a vrewis hag a bechyas er y benn.

²⁷Ev a sedhis hag a goedhas,

ev a wrowedhas stag orth hy dewdroes;

orth hy dewdroes y sedhis, y koedhas;

le may sedhis, ena y koedhas, marow.

²⁸‘Der an fenester y firas,

mamm Sisera a lagattas der an lattis:

“Prag yw y jarett mar hir ow tos?

Prag yth hok mar bell gweskel karn y jarett?”

²⁹Hy furra arloedhesow a worthyp,

yn tevri hi a worthyp an govynn hy honan:

³⁰“A nyns esons i ow kavoes hag ow kevrenna an preydh? –

mowes po diw dhe bub gour;

preydh a gwethow liwek dhe Sisera,

preydh a gwethow liwek brosys,

dew dharn a ober liwek brosys rag ow honna yn preydh?”

³¹‘Yndella re varwo oll dha eskerens, A Arloedh!

Mes re bo oll dha gowetha avel an howl dell sev yn-bann yn y nerth.’