Read the Bible

¹Mes kyns goel an Pask, pan wodhva Yesu y eur dhe vos devedhys rag tremena a'n bys ma dhe'n Tas, ow kara y dus y honan, ev a's karas bys y'n diwedh. ²Pan esens ow tybri soper, wosa an jowl dhe worra yn kolonn Yudas mab Simon Skaryoth dh'y drayta, ³ow kodhvos an Tas dhe ri pup-tra oll ynter y dhiwleuv, hag ev dhe dhos dhiworth Duw ha dehweles dhe Dhuw, ⁴ev a sevis a'n soper ha gorra dhe denewen y dhillas, ha kemmeres towell hag omwrogysa. ⁵Ena ev a dhiveris dowr yn bason, ha dalleth golghi treys an dhyskyblon, ha'ga sygha gans an towell ganso mayth o grogysys. ⁶Ytho ev a dheuth dhe Simon Peder, neb a leveris dhodho, ‘Arloedh, a wolghydh tejy ow threys vy?’ ⁷Yesu a worthybis, ‘Ty ny wodhes lemmyn pandr'a wrama, mes ty a wodhvydh a-wosa.’ ⁸Yn-medh Peder dhodho, ‘Nevra ny wolghydh ow threys evy’ Yesu a worthybis dhodho, ‘Mar ny wrav vy dha wolghi, nyns eus dhis rann genev vy.’ ⁹Yn-medh Simon Peder dhodho, ‘Arloedh, na wra golghi ow threys hepken, mes ynwedh ow diwleuv ha'm penn!’ ¹⁰Yn-medh Yesu dhodho, ‘Neb yw golghys, nyns eus dhodho edhomm a wolghi marnas an treys, mes ev yw glan yn tien; ha hwi yw glan, mes nyns owgh hwi oll.’ ¹¹Rag ev a wodhva neb a vedha orth y drayta, rakhenna y leveris, ‘Nyns owgh hwi oll glan.’

¹²Ytho wosa golghi aga threys ha kemmeres y dhillas hag esedha arta, ev a leveris dhedha, ‘A wodhowgh pandr'a wrugavy dhywgh? ¹³Hwi a'm gelow Dyskador hag Arloedh, ha hwi a gews yn ta, rag yndella yth ov. ¹⁴Ytho mar kwrugavy, agas Dyskador ha'gas Arloedh, golghi agas treys, peub ahanowgh ynwedh a dal golghi treys y gila. ¹⁵Rag my re ros dhywgh ensampel, may hwryllowgh hwi kepar dell wrugavy dhywgh. ¹⁶Yn hwir, yn hwir y lavarav dhywgh, nyns yw an kethwas brassa es y vester, na nyns yw an gannas brassa es neb a'n dannvonas. ¹⁷Mar konvedhowgh an taklow ma, gwynn agas bys mara's gwrewgh. ¹⁸Ny gowsav ahanowgh hwi oll; my a woer piw a dhewisis; mes hemm yw rag may fo an skryptor kollenwys, “Ev neb a dhybris bara genev re dhrehevis y wewenn er ow fynn.” ¹⁹Lemmyn my a lever dhywgh kyns y hwarvos, rag may kryssowgh pan hwarva, my dh'y vos. ²⁰Yn hwir, yn hwir y lavarav dhywgh, neb a dhegemmer piwpynag a dhannvenniv a wra ow degemmeres vy, ha neb a'm degemmer vy a dhegemmer neb a'm dannvonas.’

²¹Wosa leverel hemma, Yesu o troblys y'n spyrys, hag ev a dhustunias ha leverel, ‘Yn hwir, yn hwir y lavarav dhywgh, onan ahanowgh a wra ow thrayta.’ ²²An dhyskyblon a viras an eyl orth y gila, owth ombrederi piw esa ow kewsel anodho. ²³Onan a'n dhyskyblon, ev neb a wre Yesu y gara, esa ow krowedha orth moes ryb askra Yesu; ²⁴ytho Simon Peder a wrug sin dhodho dhe wovynn a biw y kewsis. ²⁵Ytho ev a boesas war-dhelergh orth bronn Yesu ha leverel dhodho, ‘Arloedh, piw yw?’ ²⁶Yesu a worthybis, ‘Ev yw, dhe neb y rov soubenn wosa my dh'y throghya.’ Ytho ev a droghyas an soubenn ha'y ri dhe Yudas mab Simon Skaryoth. ²⁷Ha wosa an soubenn Satnas a entras ynno. Ytho Yesu a leveris dhodho, ‘An pyth a wredh, gwra yn skon.’ ²⁸Mes denvyth a'n re growedhys ena ny gonvedhas prag y kewsis dhodho. ²⁹Rag re a dybis, drefenn Yudas dhe witha an pors, Yesu dhe leverel dhodho, ‘Pren an taklow usi edhomm dhyn anedha rag an goel’; po may rolla neppyth dhe'n voghosogyon. ³⁰Ytho wosa kemmeres an soubenn, ev eth yn-mes dison. Ha nos o hi.

³¹Ytho pan o gyllys yn-mes, Yesu a leveris, ‘Lemmyn glorifiys yw Mab an den, ha Duw yw glorifiys ynno. ³²Mars yw Duw glorifiys ynno, Duw ynwedh a'n glorifi ynno y honan, hag a'n glorifi a-dhistowgh. ³³A fleghes vyghan, hwath termyn berr yth esov genowgh. Hwi a'm hwila, ha dell leveris vy dhe'n Yedhewon, “Le mayth av ny yllowgh dos”, lemmyn my a'n lever dhywgh hwi. ³⁴Gorhemmynn nowydh a rov dhywgh, hwi dhe gara an eyl y gila; dell wrugavy agas kara, hwi ynwedh dhe gara an eyl y gila. ³⁵Dre hemma pub den oll a woer hwi dhe vos dyskyblon dhymm, mars eus dhywgh kerensa an eyl orth y gila.’

³⁶Simon Peder a leveris dhodho, ‘Arloedh, ple'th edh?’ Yesu a worthybis dhodho, ‘Le mayth av ny yllydh lemmyn ow siwya, mes a-wosa ty a wra ow siwya.’ ³⁷Yn-medh Peder dhodho, ‘Arloedh, prag na allav vy dha siwya lemmyn? My a dhaskorr ow bewnans ragos.’ ³⁸Yesu a worthybis, ‘Ty a dhaskorr dha vewnans a'm govis? Yn hwir, yn hwir y lavarav dhis, ny wra an kulyek kana kyns ty dhe'm nagha teyrgweyth.