Read the Bible

²‘Pes termyn y gewsydh an taklow ma,

hag y fydh geryow dha anow gwyns krev?

³A gammdreyl Duw gwirvreus?

Po a gammdreyl an Ollgalloesek an gwir?

⁴Mar peghas dha fleghes er y bynn,

ev a's delivras yn galloes aga hammweythres.

⁵Mar mynnydh hwilas Duw

ha pysi war an Ollgalloesek mersi,

⁶mars os pur hag ewnhynsek,

lemmyn ev a dhifun ragos

ha'th restorya dhe'th annedh gwiw.

⁷Kyn feu dha dhalleth byghan,

dha dhiwedh a vydh moghhes yn feur.

⁸‘Rag govynn, my a'th pys, orth an henedh tremenys,

ha dysmyk an taklow hwithrys gans an tasow;

⁹rag dhiworth de on ni, ha ny wodhon travyth;

skeus yw agan dydhyow war an norvys.

¹⁰A ny wrons dha dhyski, ha leverel dhis,

ha dyllo geryow dhiworth aga holonn?

¹¹‘A yll papyrus tevi le ma nag eus gwern?

A yll kors glasa le ma nag eus dowr?

¹²Hag i ow pleujyowa hwath, ha heb bos treghys,

i a wedher kyns pub plans arall.

¹³Yndella yw hynsyow kemmys a ankev Duw;

govenek an den didhuw a dhe goll.

¹⁴Y fydhyans yw neus munys an hav,

ha gwias kevnisenn yw y fydh.

¹⁵Ev a boes erbynn y ji mes ny sev;

ev a'n dalghenn mes ny dhur.

¹⁶Ev a sewen a-dherag an howl,

ha'y eginyow a les yn-mes der y lowarth.

¹⁷Y wreydh yw plethys a-dro dhe'n karnedh;

hag i a hwila tyller yn mysk an karregi.

¹⁸Mars yw ev distruys dhiworth y dyller,

y dyller a wra y nagha, ow leverel, “Ny'th welis bythkweth.”

¹⁹Otta, hemm yw heudh y hyns,

ha dhiworth an dor re erell a egin.

²⁰‘Otta, ny skon Duw den divlam,

na ny dhalghenn leuv drogoberoryon.

²¹Ev a lenow hwath dha anow gans hwarth,

ha dha dhiwweus gans garma.

²²An re a'th kas a vydh gwiskys yn bismer,

ha tylda an dhebelwesyon a vydh gyllys dhe goll.’