Read the Bible

¹‘Galw lemmyn; eus nebonan a wra dha worthybi?

Dhe by a'n re sans y hwredh treylya?

²Yn sur sorr a ladh an foll,

hag avi a ladh an sempel.

³My re welas an foll ow kwreydhya,

mes a-dhistowgh my a villigas y annedh.

⁴Yma y vebyon pell dhiworth sawder,

skwattys yns y'n yet,

ha nyns eus denvyth dh'aga delivra.

⁵An den nownek a dheber y drevas,

hag ev a's kemmer hwath dhiworth spern;

ha'n dus syghesik a dhyen rag y rychys.

⁶Rag ny dheu galar dhiworth an doust,

ha ny egin trobel dhiworth an dor;

⁷mes dineythys yw den dhe drobel

dell wra gwryghon nija war-vann.

⁸‘My, y hwilsen Duw,

ha dhe Dhuw my a gommendsa ow hen.

⁹Ev a wra taklow meur hag anhwiladow,

taklow bryntin heb niver.

¹⁰Ev a re glaw war an norvys

ha dannvon dowrow war an gwelyow;

¹¹ev a sett an re uvel war-vann,

ha'n re a gyn yw drehevys dhe sawder.

¹²Ev a lest towlennow an dus fel,

ma na yll aga diwleuv seweni.

¹³Ev a vagel an dus fur yn aga felder,

ha towlennow an dus sleygh yw dres dhe worfenn yn skon.

¹⁴I a vet orth tewlder dydhweyth,

ha palvala y'n hanter-dydh kepar hag y'n nos.

¹⁵Mes ev a saw an edhommek dhiworth kledha aga ganow

ha dhiworth leuv an re alloesek.

¹⁶Ytho yma govenek dhe'n boghosek,

ha kammhynseth a dhege hy ganow.

¹⁷‘Otta, gwynnvys an den a wra Duw y geredhi,

rakhenna na dhispres keredh an Ollgalloesek.

¹⁸Rag ev a woli, hag ev a lystenn;

ev a wysk, ha'y dhiwleuv a saw.

¹⁹Ev a wra dha dhelivra dhiworth hwegh trobel;

yn seyth ny wra drog mann dha dochya.

²⁰Yn divoetter ev a wra dha dhasprena dhiworth mernans,

hag yn bresel dhiworth nerth an kledha.

²¹Ty a vydh kudhys dhiworth skorja an taves,

ha ny' fydh own a dhistruyans pan dheffo.

²²Orth distruyans ha divoetter ty a hwerth,

ha ny' fydh own a vestes gwyls an norvys.

²³Rag ty a' fydh kevambos gans meyn an gwel,

ha bestes an gwel a vydh yn kres genes.

²⁴Ty a wodhvydh bos dha dylda yn kres,

ha ty a hwither dha gorlann, ha ny vydh fowt vyth.

²⁵Ty a wodhvydh ynwedh bos pals dha dhiyskynnysi,

ha dha agh kepar ha gwels an dor.

²⁶Ty a dheu dhe'th vedh yn dha gothni,

kepar dell dheu garr a reunenn war-vann yn hy seson.

²⁷Otta, hemma a hwilsyn ni; yndella yth yw.

Goslow, ha godhvydh e rag dha dhader.’