Job 32
Kynsa Areth Elihu
1Ytho an tri gour ma a astelas gorthybi, drefenn y vos gwiryon yn y dhewlagas y honan. 2Mes Elihu mab Barakel an Buzyas a deylu Ram eth ha bos pur serrys drefenn Job dhe justifia y honan moy es Duw. 3Serrys o ynwedh orth an tri howeth drefenn na gavsens gorthyp, mes spit dhe henna i a leveris bos Job kamm. 4Lemmyn Elihu re wortsa kyns kewsel drefenn aga bos kottha agesso. 5Mes pan welas nag esa gorthyp yn aga ganow y sorr a dhewis.
Notes for verses 1–51 entry
Text notes
Job 32:3 Job: Yndella y'n tekst masoretek, mes ewnans yw, a veu gwrys gans an skriba rag an ger Duw, rag revrons dhe Dhuw. View in passage
6Elihu mab Barakel an Buzyas a worthybis:
‘Yowynk ov yn blydhynyow,
ha koth owgh hwi;
rakhenna yth esa own dhymm,
ha ny vedhis diskwedhes dhywgh ow brys.
7Yn-medhav, “Dydhyow a dal kewsel,
ha niver bras a vlydhynyow a dal dyski furneth.”
8Mes yth yw spyrys yn mab-den,
anall an Ollgalloesek, a re dhodho furneth.
9Nyns yw an dus veur hag yw fur,
na nyns yw an dus koth hag a gonvedh gwirvreus.
10Rakhenna my a lever, “Goslowewgh orthiv;
My ynwedh a dhiskler dhywgh ow brys.”
11‘Otta, my a wortas agas geryow,
my a woslowas orth agas resna,
ha hwi ow hwilas geryow.
12My a wrug vri ahanowgh,
mes nyns esa nagonan a gonkludyas Job,
ny worthybis denvyth ahanowgh dh'y eryow.
13Na leverewgh, “Ni re gavas furneth;
Duw a'n feth, a-der den.”
14Ny gewsis y eryow er ow fynn vy,
ha ny worthybav dhodho gans agas arethyow.
15‘Penndegys yns, ha ny worthybons na fella;
i a astelas kewsel.
16Eus edhomm my dhe wortos, rag ny gewsons,
rag i dhe sevel ena, ha ny worthybons na fella.
17My ynwedh a worthyp ow rann;
my ynwedh a dhiskler dhywgh ow brys.
18Rag leun ov a eryow;
an spyrys ynnov a'm konstryn.
19Kepar ha gwin heb tardhell yw ow thorr;
parys dhe dardha kepar ha botellow nowydh.
20Res yw dhymm kewsel may kyffiv difres;
my a iger an dhiwweus ha gorthybi.
21Ny dhiskwedhav favour dhe dhenvyth
na ny rov hanow a enor dhe dhenvyth.
22Ny wonn fatell rov henwyn a enor –
poken ow Gwrier a'm kemmersa dhe-ves yn skon.