Read the Bible

¹‘Prag nag yw termynyow rag breus gwithys gans an Ollgalloesek,

ha prag na wel y dhydhyow an re a'n aswonn?

²Tus a gemmer orveyn dhe-ves;

i a beur greow re ladhsons.

³I a herdh dhe-ves asen an omdhivas;

i a gemmer ojyon an wedhwes avel arwoestel.

⁴I a dreyl an edhommogyon dhe denewen dhiworth an fordh;

boghosogyon an bys a omgudh war-barth.

⁵Otta, kepar hag asenes gwyls y'n difeyth

i a yn-rag dh'aga ober,

ow hwilas preydh y'n gwylvos

avel boes rag aga fleghes.

⁶I a vys yn parkow nag eus dhedha i,

ha kuntell gesigow an grappys dhiworth gwinlann tebelwas.

⁷I a wrowedh noeth dres an nos, heb dillas,

ha nyns eus kudhans dhedha y'n yeynder.

⁸Glyb yns gans glaw an menydhyow,

ha byrla an garrek drefenn fowt goskes.

⁹‘Tus a gib an omdhivas dhiworth an vronn,

ha kemmeres yn goestel fleghik an boghosek.

¹⁰I a gerdh a-dro noeth, heb dillas;

ha doen manalow, kynth yns i nownek;

¹¹I a wask olew ynter fosow an terrasow,

ha trettya an gwinwaskow, mes perthi syghes.

¹²Dhiworth an sita tus usi ow merwel a gyn,

hag enev an dus woliys a gri rag gweres;

mes ny wra Duw vri a'ga pysadow.

¹³‘Yma tus a rebell erbynn an golow,

tus na aswonn y fordhow,

na pesya war y hynsyow.

¹⁴An moldrer a sev kyns dydh-tardh

may lattho an boghosek ha'n edhommek,

hag y'n nos kepar ha lader yw.

¹⁵Lagas an avoutrer a worta an tewlwolow,

ow leverel, “Ny wra lagas vyth ow aspia”;

hag ev a doellwisk y fas.

¹⁶Y'n tewlder i a bal der an chiow,

mes y'n jydh i a worta a-ji;

ny aswonnons an golow.

¹⁷Rag tewlder down yw myttin dhedha i oll;

kowetha yns dhe vrowaghow tewlder down.

¹⁸‘Y leverowgh, “Skav yw ev war enep an dowrow;

milliges yw aga rann y'n tir

ny dreyl trettyer dhe'n gwinlannow.

¹⁹Dell wra syghor ha toemmder kibya dhe-ves dowrow an ergh,

yndella y kib Sheol an dus re beghas.

²⁰An dorr a'n ankev,

hweg yw dhe'n gontron;

ny berthir kov anodho na fella;

ytho kammhynseth yw terrys kepar ha gwydhenn.”

²¹‘I a debeldhyght an venyn gownagh hag anvap,

ha ny wrons da dhe'n wedhwes.

²²Mes Duw a denn tus alloesek dhe-ves der y nerth;

ev a sev, ha nyns yw denvyth sur a'y vewnans.

²³Ev a re dhedha diogeledh, ha skoedhys yns;

mes yma y dhewlagas war aga fordhow.

²⁴Ughelhes yns pols, hag ena gyllys;

iselhes yns, hag i a wedher kepar ha'n malow,

ha treghys kepar ha pennow greun.

²⁵‘Mar nyns yw yndella, piw a brev ow bos gowleveryas,

ha diskwedhes bos ow geryow travyth?’