Read the Bible

²‘Pes termyn y fydh kyns hwi dhe worfenna an arethyow ma?

Bedhewgh fur hag a-wosa ni a geskews.

³Prag yth on ni reknys avel chatel,

ha synsys dhe vos avlan yn agas dewlagas?

⁴Ty neb a skward y honan y'th sorr,

a vydh res an norvys dhe vos forsakys ragos?

Hag a vydh an garrek removys mes a'y le?

⁵‘Dar, golow an drogoberer yw difeudhys,

ha ny splann flamm y dan.

⁶Tewl yw an golow yn y dylda,

ha'n lugarn a-ughto yw difeudhys.

⁷Y gammow krev a vydh stroethys,

ha'y gusul y honan a'n tewl dhe'n dor.

⁸Rag ev yw tewlys yn roes der y dreys y honan;

ev a gerdh bys yn maglenn.

⁹An antell a'n kemmer er an seudhel;

ha'n maglenn a sett dalghenn ynno.

¹⁰Kroglath yw kudhys y'n dor ragdho,

ha maglenn ragdho war y fordh.

¹¹Browaghow a'n euthyk war bub tu,

ha'y helghya, ow pratha orth y dhewseudhel.

¹²Ahwer yw nownek ragdho,

terroes yw parys ragdho pan goedh ev.

¹³Dybrys vydh rannow a'y groghen,

ha kynsa-genys ankow a dheber y eseli.

¹⁴Tennys yw dhiworth an tylda a drestyas ynno,

ha dres dhe'n myghtern a vrowaghow.

¹⁵Yma tan trigys yn y dylda;

loskven yw skattrys war y annedh.

¹⁶Y wreydh yw desyghys yn-danno,

ha'y skorr a wedher a-ughto.

¹⁷Kov anodho a dhe goll dhiworth an norvys,

ha ny vydh hanow dhodho y'n stret.

¹⁸Ev yw herdhys dhiworth an golow a-berth y'n tewlder,

ha helghys yn-mes a'n bys.

¹⁹Ny vydh na agh na linyeth dhodho yn mysk y bobel,

na denvyth gesys yn y annedhow.

²⁰Tus a'n howlsedhes a's teves marth a'y denkys,

skruth a gemmer tus a'n howldrevel.

²¹Yndella yth yw annedhow an dhrogoberer yn sur,

ha hemm yw tyller an den na aswonn Duw.’